തിരുവനന്തപുരം ഗ്രീൻഫീൽഡ് സ്റ്റേഡിയത്തിൽ വെസ്റ്റ് ഇൻഡീസിനെതിരായ ഒന്നാം ഏകദിനത്തിൽ തകർപ്പൻ സെഞ്ച്വറിയും ഏകദിന ക്രിക്കറ്റിൽ 15,000 റൺസ് എന്ന ചരിത്രനേട്ടവും സ്വന്തമാക്കിയതിന് പിന്നാലെ പ്രതികരണവുമായി ഇന്ത്യൻ ബാറ്റിംഗ് ഇതിഹാസം വിരാട് കോഹ്ലി. സച്ചിൻ ടെണ്ടുൽക്കറുമായുള്ള താരതമ്യങ്ങളെക്കുറിച്ചും റെക്കോർഡുകളെക്കുറിച്ചും സംസാരിക്കവെ, സച്ചിൻ എക്കാലത്തും തനിക്ക് സച്ചിൻ തന്നെയാണെന്നും അദ്ദേഹത്തിന്റെ ലെഗസി നമ്പറുകൾക്കപ്പുറത്താണെന്നും കോഹ്ലി വ്യക്തമാക്കി. മത്സരത്തിൽ പുറത്താകാതെ 88 പന്തുകളിൽ നിന്ന് 139 റൺസാണ് കോഹ്ലി അടിച്ചുകൂട്ടിയത്. ഈ പ്രകടനത്തോടെ ഏകദിനത്തിൽ ഏറ്റവും വേഗത്തിൽ 15,000 റൺസ് തികയ്ക്കുന്ന താരമെന്ന സച്ചിന്റെ റെക്കോർഡും, ഇന്ത്യയിൽ ഏറ്റവും കൂടുതൽ ഏകദിന റൺസ് നേടുന്ന താരമെന്ന നേട്ടവും കോഹ്ലി സ്വന്തം പേരിലാക്കിയിരുന്നു. കരിയറിലെ 86-ാമത് അന്താരാഷ്ട്ര സെഞ്ച്വറിയാണ് താരം ഇതിലൂടെ കുറിച്ചത്.
സച്ചിനുമായുള്ള താരതമ്യങ്ങളെക്കുറിച്ച് കോഹ്ലി വ്യക്തമാക്കിയത് ഇങ്ങനെയാണ്, ‘എന്നെ സംബന്ധിച്ച് സച്ചിൻ എക്കാലത്തും സച്ചിൻ തന്നെയാണ്. എന്റെ ആദ്യ ക്യാപ്റ്റൻ എന്ന നിലയിൽ എം.എസ്. ധോണിയും എക്കാലത്തും ധോണി തന്നെയായിരിക്കും. ഉള്ളിൽ ആ കാര്യങ്ങൾക്ക് ഒരിക്കലും മാറ്റം വരില്ല. താനൊരു വലിയ നേട്ടങ്ങൾ കൈവരിച്ച വലിയ ആളാണെന്ന ചിന്ത എനിക്ക് ഒരിക്കലും ഉണ്ടായിട്ടില്ല.’ താൻ ഒരിക്കലും മറ്റുള്ളവരേക്കാൾ മികച്ചവനാണെന്ന് സ്വയം കരുതിയിട്ടില്ലെന്നും, ക്രിക്കറ്റിനായി കഠിനാധ്വാനം ചെയ്യാനും ശരിയായ കാര്യങ്ങൾ ചെയ്യാനുമാണ് താൻ എപ്പോഴും ശ്രമിക്കാറുള്ളതെന്നും കോഹ്ലി പറഞ്ഞു. ക്രിക്കറ്റ് ഗെയിമിൽ സച്ചിൻ വരുത്തിയ വിപ്ലവവും അദ്ദേഹം ജനങ്ങളുടെ മനസ്സിൽ ഉണ്ടാക്കിയ സ്വാധീനവും നമ്പറുകൾക്കും താരതമ്യങ്ങൾക്കും അതീതമാണെന്നും കോഹ്ലി കൂട്ടിച്ചേർത്തു. 2027 ഏകദിന ലോകകപ്പ് ലക്ഷ്യമിട്ട് മികച്ച ഫോമിലാണ് കോഹ്ലി ഇപ്പോൾ കളിക്കുന്നത്. ഏകദിന ക്രിക്കറ്റിൽ ഏറ്റവുമധികം സെഞ്ച്വറികൾ (55) നേടിയ താരമെന്ന റെക്കോർഡും നിലവിൽ കോഹ്ലിയുടെ പേരിലാണ്.