സംസ്ഥാനത്ത് ഷിഗെല്ല രോഗബാധ വീണ്ടും ആശങ്ക ഉയർത്തുന്നു. ഒക്ടോബർ മാസത്തിലെ ആദ്യ പത്ത് ദിവസത്തിനിടെ സംസ്ഥാനത്ത് 16 പേർക്കാണ് ഷിഗെല്ല സ്ഥിരീകരിച്ചത്. കഴിഞ്ഞ മാസം ആകെ 32 പേർക്ക് മാത്രമായിരുന്നു രോഗബാധയുണ്ടായിരുന്നത്. ഈ വർഷം ഇതുവരെ 507 പേർക്ക് രോഗം സ്ഥിരീകരിക്കുകയും എട്ട് പേർക്ക് ജീവൻ നഷ്ടപ്പെടുകയും ചെയ്തിട്ടുണ്ട്. കൂടാതെ 113 പേർ നിരീക്ഷണത്തിലുമാണ്.
കോഴിക്കോട് ജില്ലയിൽ ഉത്സവത്തിനിടെ പങ്കെടുത്ത ആളുകളിലാണ് രോഗവ്യാപനം കണ്ടെത്തിയിരിക്കുന്നത്. ഒക്ടോബർ ആദ്യ ഒമ്പത് ദിവസങ്ങളിൽ മാത്രം ജില്ലയിൽ 10 കേസുകൾ റിപ്പോർട്ട് ചെയ്യപ്പെട്ടു. ശുചിത്വമില്ലാത്ത വെള്ളത്തിലൂടെയും മലിനമായ ഭക്ഷണത്തിലൂടെയുമാണ് രോഗം പ്രധാനമായും പകരുന്നത്. ഫീക്കൽ-ഓറൽ പാതയിലൂടെ അതിവേഗം പടരുന്ന ഈ ബാക്ടീരിയൽ അണുബാധ ദഹനവ്യവസ്ഥയെയാണ് ഗുരുതരമായി ബാധിക്കുന്നത്.
ശരിയായി ക്ലോറിനേറ്റ് ചെയ്യാത്ത വെള്ളം കുടിക്കുക, രോഗബാധിതർ പാകം ചെയ്യുന്ന ഭക്ഷണങ്ങൾ കഴിക്കുക, ശുചിത്വമില്ലായ്മ, ഈച്ചകളിലൂടെയുള്ള രോഗാണു വ്യാപനം എന്നിവ രോഗവ്യാപനത്തിന് കാരണമാകുന്നു. ബാക്ടീരിയ ശരീരത്തിലെത്തി 1 മുതൽ 3 ദിവസത്തിനുള്ളിൽ ലക്ഷണങ്ങൾ കണ്ടുതുടങ്ങും. നീണ്ടുനിൽക്കുന്ന വയറിളക്കം, രക്തം കലർന്ന മലം, കഠിനമായ വയറുവേദന, പനി, അടിക്കടി മലശങ്കയുണ്ടാകുക എന്നിവയാണ് പ്രധാന ലക്ഷണങ്ങൾ. കുട്ടികളിലും പ്രായമായവരിലും രോഗം പെട്ടെന്ന് ഗുരുതരമാകാൻ സാധ്യതയുണ്ട്.
രോഗലക്ഷണങ്ങൾ കണ്ടാൽ ഉടൻ തന്നെ കൃത്യമായ വൈദ്യപരിശോധന തേടേണ്ടതാണ്. വയറിളക്കം വഴി ശരീരത്തിലെ ജലാംശം നഷ്ടപ്പെടുന്നത് ഒഴിവാക്കാൻ ഒ.ആർ.എസ്, തിളപ്പിച്ചാറിയ വെള്ളം, കഞ്ഞിവെള്ളം എന്നിവ ധാരാളമായി കുടിക്കണം. രോഗതീവ്രതയനുസരിച്ച് ഡോക്ടറുടെ നിർദ്ദേശപ്രകാരം ആന്റിബയോട്ടിക്കുകൾ നൽകും. രക്തം കലർന്ന മലം, കഠിനമായ വയറുവേദന, നിർത്താതെയുള്ള ഛർദ്ദി എന്നിവയുള്ളവർ ഉടൻ തന്നെ ആശുപത്രിയിൽ ചികിത്സ തേടണമെന്ന് ആരോഗ്യവകുപ്പ് മുന്നറിയിപ്പ് നൽകുന്നു.