ന്യൂഡൽഹി: കോൺഗ്രസ് അധ്യക്ഷൻ മല്ലികാർജുൻ ഖാർഗെയെ ചുറ്റിപ്പറ്റിയ ‘ശുദ്ധീകരണ’ വിവാദത്തിൽ ബിജെപിക്കെതിരെ രൂക്ഷ വിമർശനവുമായി കോൺഗ്രസ് എം.പി. ശശി തരൂർ. ബിജെപി നേതൃത്വത്തിന്റെയും ആശയത്തിന്റെയും ആഴത്തിൽ വേരൂന്നിയ വിവേചന മനോഭാവമാണ് സംഭവത്തിന് പിന്നിലെന്നാണ് തരൂർ ആരോപിച്ചത്. സംഭവത്തിന്റെ ഉത്തരവാദിത്വത്തിൽ നിന്ന് ഒഴിഞ്ഞുമാറാൻ വിശദീകരണങ്ങളോ ഖേദപ്രകടനങ്ങളോ വാക്കുകളിലെ മാറ്റങ്ങളോ ഉപയോഗിക്കാനാകില്ലെന്നും അദ്ദേഹം എക്സിൽ കുറിച്ചു.
ഖാർഗെയെപ്പോലുള്ള പ്രമുഖ ദളിത് നേതാവിനോട് ഇത്തരമൊരു സമീപനം സ്വീകരിക്കാൻ കഴിയുന്ന സാഹചര്യമാണെങ്കിൽ രാജ്യത്തെ സാധാരണ ദളിത് ജനങ്ങളും കുട്ടികളും നേരിടുന്ന അപമാനങ്ങളെക്കുറിച്ച് ചിന്തിക്കണമെന്നും തരൂർ പറഞ്ഞു. ഇത് ഖാർഗെയുടെ മാത്രം വിഷയമല്ലെന്നും രാജ്യത്തെ എല്ലാ ദളിത് വിഭാഗങ്ങളുടെയും അന്തസ്സിനെ നേരിട്ടുള്ള ആക്രമണമാണെന്നും അദ്ദേഹം ആരോപിച്ചു. സംഭവത്തിന് ഉത്തരവാദികളായവർ ഉത്തരവാദിത്വത്തിൽ നിന്ന് ഒഴിഞ്ഞുമാറാൻ അനുവദിക്കരുതെന്നും തരൂർ വ്യക്തമാക്കി.
‘ശുദ്ധീകരണം’ അല്ലെങ്കിൽ ‘സഫായി’ എന്ന വാക്കുകൾ ഉപയോഗിച്ച് സംഭവത്തിന്റെ സ്വഭാവം മറച്ചുവെക്കാനാകില്ലെന്നും തരൂർ പറഞ്ഞു. ഒരു പ്രമുഖ ദളിത് നേതാവ് എത്തിയതിന് പിന്നാലെ ‘ശുദ്ധീകരണ’ ചടങ്ങ് നടത്തുന്നത് തൊട്ടുകൂടായ്മയുടെ നടപടിയാണെന്നാണ് അദ്ദേഹത്തിന്റെ ആരോപണം. ഇത് ഭരണഘടനാവിരുദ്ധവും അംഗീകരിക്കാനാകാത്തതുമാണെന്നും എസ്.സി/എസ്.ടി പീഡന നിരോധന നിയമപ്രകാരം ശിക്ഷാർഹമായ കുറ്റമാണെന്നും തരൂർ വ്യക്തമാക്കി.
ഓഗസ്റ്റ് എട്ടിന് കോൺഗ്രസ് അധ്യക്ഷൻ മല്ലികാർജുൻ ഖാർഗെ ഹൽദ്വാനിയിലെ രാംലീല മൈതാനിയിൽ പൊതുസമ്മേളനത്തിൽ പങ്കെടുത്തിരുന്നു. ഇതിന് രണ്ട് ദിവസത്തിന് ശേഷം ശ്രീറാം സേന എന്ന പ്രാദേശിക വലതുപക്ഷ സംഘടന ഇതേ വേദിയിൽ ശുദ്ധീകരണ ചടങ്ങ് നടത്തിയതാണ് വിവാദത്തിന് തുടക്കമായത്. ഖാർഗെ ദളിതനായതിനാലാണ് ചടങ്ങ് നടത്തിയതെന്ന് ആരോപിച്ച് കോൺഗ്രസ് ഇതിനെ ആധുനിക കാലത്തെ തൊട്ടുകൂടായ്മയെന്ന് വിശേഷിപ്പിച്ചിരുന്നു. സംഭവത്തിൽ ബിജെപിയുടെ ആശയവും നേതൃത്വവും തന്നെയാണ് പ്രശ്നത്തിന്റെ അടിസ്ഥാനകാരണമെന്നാണ് തരൂരിന്റെ നിലപാട്.