കൊച്ചി : വനിതാ സംരംഭകർക്ക് അവരുടെ ബിസിനസ്സ് യാത്രയുടെ വിവിധ ഘട്ടങ്ങളിൽ പിന്തുണയും കരുത്തും നൽകുന്നതിനായി കൊട്ടക് മഹീന്ദ്ര ബാങ്കിന്റെ സി.എസ്.ആർ പദ്ധതിയായ ‘കോടക് ബിസ്ലാബ്’, എൻ.എസ്.ആർ.സി.ഇ.എല്ലുമായി ചേർന്ന് ‘വുമൺ സ്റ്റാർട്ടപ്പ് പ്രോഗ്രാമിന്റെ’ പുതിയ പതിപ്പ് പ്രഖ്യാപിച്ചു.
ആശയരൂപീകരണം മുതൽ ബിസിനസ്സ് വിപുലീകരണം വരെയുള്ള ഘട്ടങ്ങളിൽ വനിതാ സംരംഭകർക്ക് ദീർഘകാലാടിസ്ഥാനത്തിൽ പിന്തുണ നൽകുകയാണ് ഈ പദ്ധതിയുടെ ലക്ഷ്യം.
ടയർ-2, ടയർ-3 നഗരങ്ങളിലെ സംരംഭകർക്കാണ് പദ്ധതി മുൻഗണന നൽകുന്നത്. ഇതുവരെ 600-ലധികം വനിതാ സംരംഭകർക്ക് മെന്ററിംഗ്, ബിസിനസ്സ് മാർഗ്ഗനിർദ്ദേശം, വ്യവസായ ശൃംഖലകളിലേക്കുള്ള പ്രവേശനം എന്നിവയിലൂടെ പദ്ധതി തുണയായിട്ടുണ്ട്.
രാജ്യത്ത് സ്റ്റാർട്ടപ്പുകൾ വർദ്ധിക്കുന്നുണ്ടെങ്കിലും വായ്പാ ലഭ്യത, മെന്ററിംഗ്, വ്യവസായ ശൃംഖലകളിലേക്കുള്ള പ്രവേശനം തുടങ്ങിയ മേഖലകളിൽ വനിതാ സംരംഭകർ നേരിടുന്ന വെല്ലുവിളികൾ പരിഹരിക്കുകയാണ് കൊട്ടക് ബിസ്ലാബ് ലക്ഷ്യമിടുന്നത്.
വനിതാ സംരംഭകരുടെ വളർച്ച വിവിധ ഘട്ടങ്ങളിലൂടെയാണെന്ന തിരിച്ചറിവിന്റെ അടിസ്ഥാനത്തിൽ നാല് ഘട്ടങ്ങളിലായാണ് പദ്ധതി രൂപകൽപ്പന ചെയ്തിരിക്കുന്നത്: സംരംഭകത്വത്തിനായി ശ്രമിക്കുന്നവർക്കായി ‘ഫൗണ്ടേഷൻ’, ആശയങ്ങൾ പരിശോധിച്ച് മെച്ചപ്പെടുത്തുന്നതിനായി ‘പ്രീ-ഇൻക്യുബേഷൻ’, സംരംഭം വികസിപ്പിക്കുന്നതിനായി ‘ഇൻക്യുബേഷൻ’, വളർച്ചയും വിപണി വികസനവും ലക്ഷ്യമിടുന്നവർക്കായി ‘സ്കെയിൽ-അപ്പ്’ എന്നിങ്ങനെയാണ് ഘട്ടങ്ങൾ.
2025-ലെ ബാച്ചിൽ 30 സ്റ്റാർട്ടപ്പുകൾക്ക് മൂന്ന് കോടി രൂപയുടെ ധനസഹായം ഇതിനകം നൽകിയിട്ടുണ്ട്. പുനരുജ്ജീവന കൃഷി, മാലിന്യ പുനരുപയോഗം, കമ്മ്യൂണിറ്റി അധിഷ്ഠിത വിദ്യാഭ്യാസം, സാങ്കേതികവിദ്യ അധിഷ്ഠിത സംരംഭങ്ങൾ തുടങ്ങിയ മേഖലകൾക്കാണ് പദ്ധതിയിൽ മുൻഗണന ലഭിക്കുന്നത്. കൂടുതൽ വിവരങ്ങൾക്കും അപേക്ഷ സമർപ്പിക്കുന്നതിനും https://tinyurl.com/2y92fpcy എന്ന വെബ്സൈറ്റ് സന്ദർശിക്കാവുന്നതാണ്.