കൊച്ചി : പെട്രോളിയം ഉൽപ്പന്നങ്ങളുടെ ഉപഭോഗം കുറയ്ക്കുന്നതും പൊതുഗതാഗത സംവിധാനങ്ങൾ പ്രയോജനപ്പെടുത്തുന്നതും സ്വദേശി ഉൽപ്പന്നങ്ങളെ പ്രോത്സാഹിപ്പിക്കുന്നതും രാജ്യത്തിന്റെ സാമ്പത്തിക ഭദ്രതയും ഊർജ സുരക്ഷയും ഉറപ്പാക്കാൻ സഹായിക്കുമെന്ന് സാമ്പത്തിക വിദഗ്ധർ അഭിപ്രായപ്പെട്ടു. പശ്ചിമേഷ്യൻ പ്രതിസന്ധിയുടെ പശ്ചാത്തലത്തിൽ, രാജ്യം സ്വീകരിക്കുന്ന പുതിയ സാമ്പത്തിക നയങ്ങളോട് ജനങ്ങൾ സഹകരിക്കേണ്ട നിർണ്ണായക ഘട്ടമാണിതെന്ന് വിദഗ്ധർ വിലയിരുത്തി.
രാജ്യാന്തര തലത്തിലെ യുദ്ധസാഹചര്യങ്ങൾ പെട്രോളിയം ഉൽപ്പന്നങ്ങൾ, പാചകവാതകം, വളം, ഭക്ഷ്യവസ്തുക്കൾ എന്നിവയുടെ വില വർധിക്കാൻ ഇടയാക്കിയിട്ടുണ്ട്. ക്രൂഡ് ഓയിൽ, വളം, ഭക്ഷ്യഎണ്ണ എന്നിവയ്ക്കായി വിദേശ രാജ്യങ്ങളെ വൻതോതിൽ ആശ്രയിക്കുന്നതിനാൽ, ഇവയുടെ വിലവർധനവ് ഇന്ത്യയുടെ ഇറക്കുമതി ചെലവ് കുത്തനെ ഉയർത്തും.
പെട്രോൾ, ഡീസൽ ഉപഭോഗം നിയന്ത്രിക്കുന്നതിലൂടെ ക്രൂഡ് ഓയിൽ ഇറക്കുമതി കുറയ്ക്കാൻ സാധിക്കും. പൊതുഗതാഗത സംവിധാനങ്ങൾ ഉപയോഗപ്പെടുത്തുന്നതും ആഭ്യന്തര വിനോദസഞ്ചാരത്തിന് മുൻഗണന നൽകുന്നതും സ്വദേശി ഉൽപ്പന്നങ്ങൾ വാങ്ങുന്നതും രാജ്യത്തെ സാമ്പത്തിക ഇടപാടുകൾ രാജ്യത്തിനുള്ളിൽ തന്നെ നിലനിർത്താൻ സഹായിക്കും. പ്രകൃതിദത്ത കൃഷിരീതികളും പുനരുപയോഗ ഊർജ സ്രോതസ്സുകളും പ്രയോജനപ്പെടുത്തുന്നത് വിദേശ ഇന്ധനങ്ങളെയും രാസവളങ്ങളെയും ആശ്രയിക്കുന്നത് ഘട്ടംഘട്ടമായി കുറയ്ക്കാൻ സഹായിക്കും
രാജ്യാന്തര വിപണിയിൽ വൻ ചാഞ്ചാട്ടമുണ്ടായിട്ടും രാജ്യത്തെ പൊതുമേഖലാ എണ്ണക്കമ്പനികൾ ഇന്ധനവില നിയന്ത്രിച്ചു നിർത്തുന്നതിലും വിതരണം തടസ്സമില്ലാതെ നടത്തുന്നതിലും വിജയിച്ചിട്ടുണ്ട്. ആഗോള പ്രതിസന്ധികൾക്കിടയിലും തടസ്സമില്ലാത്ത ഇന്ധനവിതരണം ഉറപ്പാക്കുന്നത് റിഫൈനറികൾ, ബോട്ട്ലിങ് പ്ലാന്റുകൾ, പൈപ്പ്ലൈൻ ശൃംഖല എന്നിവയുൾപ്പെടുന്ന ഇന്ത്യയുടെ സുസജ്ജമായ അടിസ്ഥാന സൗകര്യങ്ങളാണ്. പൊതുജനങ്ങളുടെ ഭാഗത്തുനിന്നുള്ള സഹകരണം രാജ്യത്തിന്റെ സമ്പദ്വ്യവസ്ഥയിൽ വലിയ ചലനങ്ങൾ സൃഷ്ടിക്കുമെന്നാണ് സാമ്പത്തിക വിദഗ്ധർ ചൂണ്ടിക്കാട്ടുന്നത്.