രജനികാന്ത്-നെൽസൺ കൂട്ടുകെട്ടിൽ പുറത്തിറങ്ങിയ ‘ജയിലർ’ എന്ന വൻ വിജയത്തിന് ശേഷം ചിത്രത്തിന്റെ രണ്ടാം ഭാഗത്തിനായുള്ള കാത്തിരിപ്പിലാണ് ആരാധകർ. മുത്തുവേൽ പാണ്ഡ്യനായി രജനികാന്ത് വീണ്ടുമെത്തുമ്പോൾ, ഇന്ത്യൻ സിനിമയിലെ മുൻനിര താരങ്ങൾ ഒന്നിക്കുന്നുവെന്ന റിപ്പോർട്ടുകളാണ് പുറത്തുവരുന്നത്. ആദ്യ ഭാഗത്തിൽ മോഹൻലാലിന്റെ കോസ്റ്റ്യൂം ഡിസൈനറായിരുന്ന ജിഷാദ് ഷംസുദ്ധീൻ സോഷ്യൽ മീഡിയയിൽ പങ്കുവെച്ച ഒരു എ.ഐ ചിത്രം ഇപ്പോൾ വലിയ ചർച്ചകൾക്ക് വഴിതെളിച്ചിരിക്കുകയാണ്. മോഹൻലാൽ, രജനികാന്ത്, ഷാരുഖ് ഖാൻ, ശിവരാജ് കുമാർ എന്നിവർ ഒന്നിച്ചുള്ള ഈ ചിത്രം രണ്ടാം ഭാഗത്തിലെ വമ്പൻ സർപ്രൈസുകളിലേക്കുള്ള സൂചനയാണോ എന്നാണ് പ്രേക്ഷകർ ഉറ്റുനോക്കുന്നത്.
ആദ്യ ഭാഗത്തിൽ തകർപ്പൻ പ്രകടനം കാഴ്ചവെച്ച വിനായകൻ രണ്ടാം ഭാഗത്തിലുമുണ്ടാകുമെന്ന് താരം തന്നെ നേരത്തെ സ്ഥിരീകരിച്ചിരുന്നു. ഇതിന് പുറമെ വിജയ് സേതുപതിയും ചിത്രത്തിൽ ഒരു പ്രധാന വേഷത്തിൽ എത്തുന്നുണ്ടെന്നാണ് വിവരം. മലയാളികൾ ഏറെ ആകാംക്ഷയോടെ കാത്തിരിക്കുന്നത് മോഹൻലാലിന്റെ ‘മാത്യു’ എന്ന ഡോൺ കഥാപാത്രം രണ്ടാം ഭാഗത്തിലും ഉണ്ടാകുമോ എന്നറിയാനാണ്. ഇക്കാര്യത്തിൽ ഔദ്യോഗിക സ്ഥിരീകരണം വന്നിട്ടില്ലെങ്കിലും, ആദ്യ ഭാഗത്തിലെ താരങ്ങളുടെ അതിഥി വേഷങ്ങൾ ചിത്രത്തിന്റെ വിജയത്തിൽ നിർണ്ണായക പങ്കുവഹിച്ചതിനാൽ രണ്ടാം ഭാഗത്തിലും സമാനമായ നീക്കങ്ങൾ ഉണ്ടാകുമെന്ന് കരുതപ്പെടുന്നു
അനിരുദ്ധ് രവിചന്ദർ തന്നെ സംഗീതം നിർവ്വഹിക്കുന്ന ജയിലർ 2, ആക്ഷൻ രംഗങ്ങളാൽ സമ്പന്നമായിരിക്കും. തമിഴ് സിനിമയിൽ തന്നെ ഏറ്റവും വലിയ ഓപ്പണിംഗ് ലഭിക്കാൻ സാധ്യതയുള്ള പ്രോജക്റ്റുകളിൽ ഒന്നാണിത്. ആദ്യ ഭാഗം ആഗോള ബോക്സ് ഓഫീസിൽ നിന്ന് 600 കോടിയിലധികം രൂപയാണ് നേടിയത്. നിലവിൽ രണ്ടാം ഭാഗത്തിന്റെ ചിത്രീകരണം പുരോഗമിച്ചുകൊണ്ടിരിക്കുകയാണ്. സൂപ്പർ താരങ്ങളുടെ സംഗമം യാഥാർത്ഥ്യമായാൽ ഇന്ത്യൻ സിനിമയിലെ തന്നെ ഏറ്റവും വലിയ മൾട്ടിസ്റ്റാർ ചിത്രമായി ജയിലർ 2 മാറും.