കേരളത്തിന്റെ ഭരണത്തുടർച്ചയോ ഭരണമാറ്റമോ തീരുമാനിക്കുന്ന നിർണായകമായ വോട്ടെണ്ണൽ നടപടികൾ ഇന്ന് രാവിലെ എട്ടു മണിയോടെ ആരംഭിച്ചു. വോട്ടെടുപ്പ് കഴിഞ്ഞ് 25 ദിവസങ്ങൾ നീണ്ടുനിന്ന ആകാംക്ഷകൾക്കാണ് ഇതോടെ വിരാമമായിരിക്കുന്നത്. വോട്ടെണ്ണലിന്റെ ആദ്യ ഘട്ടത്തിൽ തന്നെ യുഡിഎഫും എൽഡിഎഫും തമ്മിൽ ഇഞ്ചോടിഞ്ച് പോരാട്ടമാണ് നടക്കുന്നത്. സംസ്ഥാനത്തെ 140 മണ്ഡലങ്ങളിലായി 43 കേന്ദ്രങ്ങളിലാണ് വോട്ടെണ്ണൽ പുരോഗമിക്കുന്നത്. ഉച്ചയോടെ സംസ്ഥാനത്തെ രാഷ്ട്രീയ ചിത്രം പൂർണ്ണമായും വ്യക്തമാകുമെന്നാണ് പ്രതീക്ഷിക്കുന്നത്. കേരളത്തിന് പുറമെ തമിഴ്നാട്, പശ്ചിമ ബംഗാൾ, അസം, പുതുച്ചേരി എന്നീ സംസ്ഥാനങ്ങളിലെ വോട്ടെണ്ണലും ഇതിനോടൊപ്പം നടക്കുന്നുണ്ട്.
പത്തുവർഷത്തെ ഇടവേളയ്ക്ക് ശേഷം ശക്തമായ തിരിച്ചുവരവ് നടത്താനാകുമെന്ന ഉറച്ച വിശ്വാസത്തിലാണ് യുഡിഎഫ് ക്യാമ്പ്. എന്നാൽ, എക്സിറ്റ് പോൾ പ്രവചനങ്ങൾക്കപ്പുറം നേരിയ ഭൂരിപക്ഷത്തോടെ മൂന്നാം പിണറായി സർക്കാർ അധികാരത്തിൽ വരുമെന്ന് എൽഡിഎഫും അവകാശപ്പെടുന്നു. അതേസമയം, സംസ്ഥാന രാഷ്ട്രീയത്തിൽ നിർണ്ണായക സ്വാധീനമാകാൻ കഴിയുമെന്ന പ്രതീക്ഷയിലാണ് ബിജെപി. ഫലം എങ്ങോട്ട് വേണമെങ്കിലും മറിയാവുന്ന മുപ്പതിലേറെ മണ്ഡലങ്ങൾ നിലവിലുണ്ടെന്നത് ഇത്തവണത്തെ മത്സരത്തെ അതീവ ആവേശകരമാക്കുന്നു. വരും മണിക്കൂറുകളിൽ പുറത്തുവരുന്ന ഓരോ സൂചനയും കേരളത്തിന്റെ അടുത്ത അഞ്ചുവർഷത്തെ ഭാവി നിർണ്ണയിക്കുന്നതിൽ പ്രധാനമാണ്.