തെരഞ്ഞെടുപ്പ് തോൽവികൾക്ക് പിന്നാലെ പാർട്ടിക്കുള്ളിലെ ആഭ്യന്തര പ്രവണതകൾക്കെതിരെ കടുത്ത വിമർശനവുമായി സിപിഎമ്മിൽ വീണ്ടും തെറ്റ് തിരുത്തൽ രേഖ. ഡൽഹിയിൽ ചേർന്ന സിപിഎം പൊളിറ്റ് ബ്യൂറോ യോഗം രേഖയ്ക്ക് അന്തിമ രൂപം നൽകി. വരാനിരിക്കുന്ന കേന്ദ്ര കമ്മിറ്റി യോഗത്തിൽ ഈ രേഖ വിശദമായ ചർച്ചയ്ക്ക് വെയ്ക്കും. കേരളത്തിലെ ഉൾപ്പെടെയുള്ള മുതിർന്ന നേതാക്കൾക്ക് പാർലമെന്ററി പദവികളോട് വല്ലാത്ത ആഗ്രഹമാണെന്ന് രേഖയിൽ കടുത്ത ഭാഷയിൽ വിമർശിക്കുന്നു.
പാർട്ടിക്കുള്ളിൽ വളർന്നുവരുന്ന തെറ്റായ പ്രവണതകളെ അടിയന്തരമായി തിരുത്തണമെന്നാണ് പൊളിറ്റ് ബ്യൂറോ നൽകുന്ന കർശന നിർദ്ദേശം. പാർലമെന്ററി സംവിധാനത്തിലൂടെ മാത്രമേ ജനങ്ങളുടെ പ്രശ്നങ്ങൾക്ക് പരിഹാരം കാണാൻ കഴിയൂ എന്ന് കരുതുന്നത് വെറും വ്യാമോഹമാണ്. ചില നേതാക്കൾക്ക് അധികാരത്തോടുള്ള വല്ലാത്ത ആർത്തി പാർട്ടിക്ക് ദോഷം ചെയ്യുന്നു. മുതിർന്ന നേതാക്കൾ അടക്കം പാർട്ടി വിട്ട് മറ്റ് മുന്നണികളുടെ ഭാഗമായി തെരഞ്ഞെടുപ്പിൽ മത്സരിച്ചതിനെ യോഗത്തിൽ നേതാക്കൾ ചൂണ്ടിക്കാട്ടി. ജി. സുധാകരൻ, ടി.കെ. ഗോവിന്ദൻ എന്നിവരുടെ നിലപാടുകൾ ഇതിന് ഉദാഹരണങ്ങളായി നേതാക്കൾ ചർച്ചകളിൽ സൂചിപ്പിച്ചു.
കേരള റിപ്പോർട്ടിന്മേൽ പിബിയിൽ ഉയർന്നുവന്ന കടുത്ത വിമർശനങ്ങളും തിരുത്തലുകളും കൂടി ഉൾപ്പെടുത്തി വിപുലീകരിച്ച ശേഷമാണ് രേഖ കേന്ദ്ര കമ്മിറ്റിയുടെ പരിഗണനയ്ക്ക് വിടുന്നത്. എന്നാൽ, സംസ്ഥാന ഘടകത്തിന്റെ റിപ്പോർട്ട് പൂർണ്ണമായി അംഗീകരിച്ചിട്ടുണ്ടോ എന്ന ചോദ്യത്തിന് എം.എ. ബേബി വ്യക്തമായ മറുപടി നൽകാൻ തയ്യാറായില്ല. പാർട്ടിക്കുള്ളിലെ തെറ്റായ പ്രവണതകൾ തിരുത്താനുള്ള കർശന നിർദ്ദേശങ്ങളോടെയാകും രേഖ അടുത്ത സിസി യോഗം ചർച്ച ചെയ്യുക.