ബിഗ് സ്ക്രീനിലും സോഷ്യൽ മീഡിയയിലും ഒരുപോലെ സജീവമായ നടി നസ്രിയ നസീമിന്റെ ഏറ്റവും പുതിയ ഇൻസ്റ്റാഗ്രാം സ്റ്റോറിയാണ് ഇപ്പോൾ സിനിമാ ലോകത്തും ആരാധകർക്കിടയിലും വലിയ ചർച്ചയായിരിക്കുന്നത്. ജീവിതത്തിലെ മുന്നറിയിപ്പുകളെയും പ്രകോപനങ്ങളെയും സൂചിപ്പിക്കുന്ന തരത്തിലുള്ള ഒരു നിഗൂഢമായ ഉദ്ധരണിയാണ് നടി തന്റെ സോഷ്യൽ മീഡിയ പേജിൽ പങ്കുവെച്ചിരിക്കുന്നത്.
“ചുവപ്പു കണ്ടാൽ നെട്ടോട്ടമോടുന്ന കാളകൾക്ക് നിയന്ത്രണം വിടുന്നതിനെ കുറിച്ച് ഞാനേറെ ചിന്തിച്ചിരുന്നു. പക്ഷേ, ഇപ്പോൾ ഞാനും…” എന്നർത്ഥം വരുന്ന വരികളാണ് നസ്രിയ സ്റ്റോറിയാക്കിയത്. താൻ ജീവിതത്തിൽ നേരിട്ട ചില മുന്നറിയിപ്പുകൾ അവഗണിച്ചതിന്റെ ഫലമാണ് ഇപ്പോൾ അനുഭവിക്കുന്നത് എന്ന പരോക്ഷമായ സൂചനയാണ് ഈ ‘റെഡ് ഫ്ലാഗ്’ പോസ്റ്റിലൂടെ താരം നൽകുന്നത്. സ്പെയിനിലെ പ്രസിദ്ധമായ കാളപ്പോരിൽ നിന്നും പ്രചോദനം ഉൾക്കൊണ്ടുള്ളതാണ് ഈ ഉദ്ധരണി. സാധാരണയായി ദേഷ്യവും പ്രകോപനവും ഉണ്ടാക്കുന്ന സാഹചര്യങ്ങളെയാണ് ‘കാളയ്ക്ക് മുന്നിലെ ചുവപ്പുതുണി’ എന്ന് വിശേഷിപ്പിക്കാറുള്ളത്. കൂടാതെ, വ്യക്തിബന്ധങ്ങളിലെ അപായസൂചനകൾ തിരിച്ചറിഞ്ഞിട്ടും അതിൽ തന്നെ തുടരുന്ന അവസ്ഥയെ സൂചിപ്പിക്കാനും ‘റെഡ് ഫ്ലാഗ്’ എന്ന പദം ഉപയോഗിക്കാറുണ്ട്.
ടൊവിനോ തോമസുമായി ഒന്നിക്കുന്ന ‘എൽ ക്ലാസികോ’ എന്ന പുതിയ ചിത്രത്തിന്റെ പ്രൊമോഷന്റെ ഭാഗമാണോ ഈ പോസ്റ്റ് എന്നാണ് ഒരു വിഭാഗം ആരാധകർ ചോദിക്കുന്നത്. സുഹൃദ്ബന്ധങ്ങളിലോ കരിയറിലോ താരം നേരിടുന്ന എന്തെങ്കിലും തകർച്ചയെക്കുറിച്ചാണോ നടി സംസാരിക്കുന്നത് എന്നാണ് മറ്റു ചിലരുടെ സംശയം. നസ്രിയയുടെ ഇത്തരമൊരു പോസ്റ്റ് ഇതാദ്യമായല്ല ചർച്ചയാകുന്നത്. മുൻപ് നല്ല ജോലി, കുടുംബം, കരിയർ എന്നിവ തിരഞ്ഞെടുത്ത് ഭാവി ഭദ്രമാക്കാൻ ആഹ്വാനം ചെയ്യുന്ന ഒരു പോസ്റ്റ് നടി പങ്കുവെച്ചിരുന്നു. മാത്രമല്ല, കഴിഞ്ഞ ഏപ്രിലിൽ താൻ സിനിമകളിൽ നിന്ന് വിട്ടുനിൽക്കുന്നതിന്റെ കാരണവും നസ്രിയ തുറന്നുപറഞ്ഞിരുന്നു. കുറച്ചുകാലമായി വ്യക്തിപരവും വൈകാരികവുമായ ചില വലിയ പ്രതിസന്ധികളിലൂടെയാണ് താൻ കടന്നുപോകുന്നതെന്നും, ഇപ്പോൾ സ്വയം വീണ്ടെടുപ്പിന്റെ പാതയിലാണെന്നുമായിരുന്നു അന്ന് നസ്രിയ വ്യക്തമാക്കിയത്. ബേസിൽ ജോസഫിനൊപ്പം അഭിനയിച്ച ‘സൂക്ഷ്മദർശിനി’യാണ് നസ്രിയയുടേതായി ഒടുവിൽ തിയേറ്ററുകളിലെത്തിയ ചിത്രം. ‘ആവേശം’ സംവിധായകൻ ജിത്തു മാധവൻ തമിഴിൽ ഒരുക്കുന്ന പുതിയ സൂര്യ ചിത്രത്തിൽ നായികയായി അഭിനയിക്കാനുള്ള തയ്യാറെടുപ്പിലാണ് താരം ഇപ്പോൾ.