ലോകകപ്പിലെ തകർപ്പൻ തുടക്കവുമായി നിലവിലെ ജേതാക്കളായ അർജന്റീന. ഗ്രൂപ്പ് മത്സരത്തിൽ അൾജീരിയയെ എതിരില്ലാത്ത മൂന്ന് ഗോളുകൾക്ക് തകർത്തുവിട്ട അർജന്റീനയ്ക്കായി നായകൻ ലയണൽ മെസ്സി ഹാട്രിക്കോടെ തിളങ്ങി. മത്സരത്തിൽ ഉടനീളം മികച്ച പ്രകടനം പുറത്തെടുത്ത മെസ്സി, ഒട്ടേറെ റെക്കോഡുകളും തന്റെ പേരിലാക്കി. എന്നാൽ, മത്സരത്തിനിടെ നടന്ന ഒരു ഫൗൾ വലിയ വിവാദങ്ങൾക്കാണ് വഴിവെച്ചിരിക്കുന്നത്.
പതിനേഴാം മിനിറ്റിൽ മെസ്സി തന്റെ ആദ്യ ഗോൾ നേടിയതിന് പിന്നാലെയായിരുന്നു വിവാദ സംഭവം. പന്തിനായുള്ള പോരാട്ടത്തിനിടെ അൾജീരിയൻ താരം ഐസാ മാൻഡിയുടെ കാലിന്റെ പിൻഭാഗത്ത് മെസ്സി ചവിട്ടുകയായിരുന്നു. റഫറി ഉടൻ തന്നെ ഫൗൾ വിളിക്കുകയും അൾജീരിയക്ക് ഫ്രീകിക്ക് അനുവദിക്കുകയും ചെയ്തെങ്കിലും, മെസ്സിക്ക് നേരെ മഞ്ഞക്കാർഡ് പോലും ഉയർത്താൻ അധികൃതർ തയ്യാറായില്ല. മെസ്സിയായതുകൊണ്ടാണ് കാർഡ് നൽകാതിരുന്നതെന്നും, ഇത് ചുവപ്പ് കാർഡ് അർഹിക്കുന്ന ഗുരുതരമായ ഫൗളാണെന്നും ആരാധകർ സമൂഹമാധ്യമങ്ങളിലൂടെ വിമർശനം ഉയർത്തുന്നുണ്ട്. വാർ പരിശോധന നടത്താത്തതിനെതിരെയും ശക്തമായ പ്രതിഷേധം ഉയരുന്നുണ്ട്.
ആദ്യ പകുതിയിൽ ഏകപക്ഷീയമായ ഒരു ഗോളിന് മുന്നിട്ടുനിന്ന അർജന്റീന, രണ്ടാം പകുതിയിൽ മെസ്സിയുടെ മികവിൽ രണ്ട് ഗോളുകൾ കൂടി അധികമായി നേടി. 60-ാം മിനിറ്റിലും 76-ാം മിനിറ്റിലും പന്ത് വലയിലെത്തിച്ച് മെസ്സി ഹാട്രിക് പൂർത്തിയാക്കി. ഇതോടെ ലോകകപ്പിലെ മെസ്സിയുടെ ആകെ ഗോൾനേട്ടം 16 ആയി ഉയർന്നു. ലോകകപ്പിൽ ഏറ്റവും കൂടുതൽ ഗോളുകൾ നേടിയ മുൻ ജർമൻ സ്ട്രൈക്കർ മിറോസ്ലാവ് ക്ലോസെയുടെ റെക്കോഡിനൊപ്പമെത്താനും ഈ ഹാട്രിക്കിലൂടെ മെസ്സിക്ക് സാധിച്ചു. ഇനി ഒരു ഗോൾ കൂടി നേടിയാൽ ക്ലോസെയെ മറികടന്ന് ലോകകപ്പിലെ എക്കാലത്തെയും മികച്ച ഗോൾവേട്ടക്കാരനായി മെസ്സിക്ക് ചരിത്രം കുറിക്കാം.