രാജ്യത്തെ ദേശീയപാതകളിൽ യാത്രക്കാർക്ക് ഇനി ടോൾ പ്ലാസകളിൽ കാത്തുനിൽക്കാതെ കടന്നുപോകാം. ഇതിനായുള്ള ‘മൾട്ടി ലൈൻ ഫ്രീ ഫ്ലോ’ സംവിധാനത്തിന്റെ പരീക്ഷണം വിജയകരമായി പൂർത്തിയായതായി കേന്ദ്ര ഗതാഗത മന്ത്രി നിതിൻ ഗഡ്കരി അറിയിച്ചു. ഈ പുതിയ സംവിധാനം നിലവിൽ വരുന്നതോടെ ടോൾ പ്ലാസകളിലെ ബാരിയറുകൾ ഒഴിവാക്കപ്പെടും. ആർട്ടിഫിഷ്യൽ ഇന്റലിജൻസ് സാങ്കേതികവിദ്യയുടെ സഹായത്തോടെയാണ് ഇത് പ്രവർത്തിക്കുന്നത്. മണിക്കൂറിൽ 80 കിലോമീറ്റർ വേഗതയിൽ സഞ്ചരിക്കുന്ന വാഹനങ്ങളിൽ നിന്ന് പോലും കൃത്യമായി ടോൾ തുക ഈടാക്കാൻ ഈ നൂതന സംവിധാനത്തിന് സാധിക്കും. എൻ.എച്ച് 48-ലെ ചോർയാസി ടോൾ പ്ലാസയിൽ നടത്തിയ പരീക്ഷണം വിജയകരമായതോടെ രാജ്യമൊട്ടാകെ ഇത് നടപ്പിലാക്കാനാണ് സർക്കാർ ഒരുങ്ങുന്നത്.
വാഹനങ്ങൾ ടോൾ പ്ലാസകളിൽ നിർത്തി സമയം കളയേണ്ടതില്ല എന്നതാണ് ഈ പദ്ധതിയുടെ പ്രധാന സവിശേഷത. ഇത് യാത്രാസമയം ഗണ്യമായി കുറയ്ക്കുകയും വാഹനങ്ങൾ ക്യൂ നിൽക്കുന്നത് മൂലമുണ്ടാകുന്ന മലിനീകരണം കുറയ്ക്കാൻ സഹായിക്കുകയും ചെയ്യും. ഡൽഹി, രാജസ്ഥാൻ, ഗുജറാത്ത് എന്നിവിടങ്ങളിലെ നൂറിലധികം ടോൾ പ്ലാസകളിലായിരിക്കും ആദ്യഘട്ടത്തിൽ ഈ സംവിധാനം ഏർപ്പെടുത്തുക. ഫാസ്റ്റാഗിൽ ബാലൻസ് ഇല്ലാത്ത വാഹനങ്ങളെ എഐ ക്യാമറകൾ വഴി തിരിച്ചറിയാനും അവർക്ക് ഇ-നോട്ടീസ് അയക്കാനും ഈ പുതിയ സാങ്കേതികവിദ്യയിലൂടെ സാധിക്കും. ഘട്ടംഘട്ടമായി രാജ്യത്തെ എല്ലാ ദേശീയപാതകളിലും ഈ മാറ്റം കൊണ്ടുവരുമെന്ന് കേന്ദ്രമന്ത്രി വ്യക്തമാക്കി.