തമിഴ് താരം സൂര്യ ചെന്നൈ വിട്ട് മുംബൈയിലേക്ക് സ്ഥിരതാമസം മാറിയെന്ന പ്രചരിക്കുന്ന അഭ്യൂഹങ്ങൾക്ക് വിരാമമിട്ട് താരം തന്നെ രംഗത്ത്. താൻ ചെന്നൈയിൽ തന്നെയാണ് താമസിക്കുന്നതെന്നും മുംബൈയിലേക്ക് സ്ഥിരമായി മാറിയിട്ടില്ലെന്നും സൂര്യ വ്യക്തമാക്കി. സഹോദരനും നടനുമായ കാർത്തിയുടെ പുതിയ ചിത്രമായ ‘സർദാർ 2’വിന്റെ ഓഡിയോ-ട്രെയിലർ ലോഞ്ച് ചെന്നൈയിൽ വെച്ച് നടന്നപ്പോഴാണ് സൂര്യ ഇക്കാര്യത്തിൽ വ്യക്തത വരുത്തിയത്.
‘‘ഞാൻ ഇവിടെ ചെന്നൈയിൽ തന്നെയുണ്ട്. അങ്ങനെ പോകുന്ന ആളല്ല. ഒട്ടേറെ ആളുകൾക്ക് ഈ കാര്യത്തിൽ സംശയമുള്ളതായി അറിയാം. ‘നാൻ ഇങ്ക താൻ ഇറുക്കേ’. മുംബൈയിൽ വല്ലപ്പോഴും പോയി തിരിച്ചു വരാറാണ് പതിവ്,’’ എന്ന് ആരാധകരുടെ ചോദ്യങ്ങൾക്ക് മറുപടിയായി സൂര്യ പറഞ്ഞു. സിനിമയുടെ ഷൂട്ടിങ്ങിന്റെയും മറ്റും ഭാഗമായുള്ള യാത്രകളിലാണ് തന്നെ സ്ഥിരമായി എയർപോർട്ടിൽ കാണുന്നതെന്നും അദ്ദേഹം കൂട്ടിച്ചേർത്തു. സൂര്യയുടെ ഈ പ്രഖ്യാപനം വലിയ കരഘോഷത്തോടെയാണ് വേദിയിലുണ്ടായിരുന്ന ആരാധകർ ഏറ്റെടുത്തത്. ചടങ്ങിൽ സഹോദരൻ കാർത്തിയുടെ അഭിനയ ശൈലിയെയും കഥാപാത്രങ്ങളുടെ തിരഞ്ഞെടുപ്പിനെയും സൂര്യ പ്രശംസിക്കുകയും ചെയ്തു.
ജ്യോതികയും മക്കളും മുംബൈയിലാണ് താമസം. ജ്യോതികയുടെ മാതാപിതാക്കളും ഇവർക്കൊപ്പമുണ്ട്. തനിക്കും കുടുംബത്തിനുമൊപ്പം സന്തോഷത്തോടെ ഇത്രയും വർഷം ജീവിച്ച ജ്യോതിക സ്വന്തം മാതാപിതാക്കൾക്കും സുഹൃത്തുക്കൾക്കുമൊപ്പം സമയം ചെലവഴിക്കണമെന്ന ആഗ്രഹമാണ് കുടുംബത്തിന്റെ മുംബൈയിലേക്കുള്ള യാത്രയ്ക്ക് കാരണമെന്ന് സൂര്യ മുൻപ് വ്യക്തമാക്കിയിരുന്നു. എല്ലാ സൗകര്യങ്ങളും തനിക്കു മാത്രം കിട്ടിയാൽ പോരാ അത് ജ്യോതികയ്ക്കും കിട്ടണം. കുട്ടികളുടെ പഠനാവശ്യങ്ങളും മുംബൈയിലാണ് കൂടുതൽ സൗകര്യപ്രദമായിട്ടുള്ളത്. ഒരു മാസത്തിൽ ഇരുപത് ദിവസം ജോലി ചെയ്യുകയും ബാക്കി പത്തു ദിവസം ഫോൺ കോൾ പോലും എടുക്കാതെ മുംബൈയിൽ കുടുംബത്തോടൊപ്പം സമയം ചെലവഴിക്കുന്നതിൽ സന്തോഷം കണ്ടെത്തുകയാണെന്നും സൂര്യ മുൻപ് പറഞ്ഞിരുന്നു.
പി.എസ്. മിത്രൻ സംവിധാനം ചെയ്യുന്ന ‘സർദാർ 2’ സെപ്റ്റംബർ 10-നാണ് തിയറ്ററുകളിലെത്തുന്നത്. അതേസമയം, ബോക്സ് ഓഫിസിൽ മികച്ച വിജയം നേടിയ ‘വിശ്വനാഥൻ ആൻഡ് സൺസ്’ ആണ് സൂര്യയുടേതായി ഒടുവിൽ തിയറ്ററുകളിലെത്തിയ ചിത്രം.