കോവിഡ്-19 മഹാമാരി ലോകമെമ്പാടും ലോക്ക്ഡൗണുകൾ സൃഷ്ടിക്കുകയും അനേകരുടെ ജീവൻ അപഹരിക്കുകയും ചെയ്തതിനൊപ്പം വിവാഹ ബന്ധങ്ങളെപ്പോലും തകർത്തെറിഞ്ഞതായി മദ്രാസ് ഹൈക്കോടതി. 2020 നും 2022 നും ഇടയിലുള്ള കോവിഡ് കാലഘട്ടത്തിൽ വിവാഹിതരായ ദമ്പതികൾക്കിടയിൽ വൈവാഹിക തർക്കങ്ങൾ ഗണ്യമായി വർദ്ധിച്ചതായി കോടതി നിരീക്ഷിച്ചു. വെള്ളിയാഴ്ച (ഒക്ടോബർ 16) ഒരു സിവിൽ റിവിഷൻ ഹർജി പരിഗണിക്കവെയാണ് ജസ്റ്റിസ് എൻ. ആനന്ദ് വെങ്കിടേഷിന്റെ സുപ്രധാന പരാമർശം. തർക്കങ്ങൾ രമ്യമായി പരിഹരിക്കുന്നതിന് സംസ്ഥാനവ്യാപകമായി ഡാറ്റ ശേഖരിക്കാനും കോടതി ഉത്തരവിട്ടു.
കഴിഞ്ഞ മൂന്ന് മാസത്തിനിടെ കോടതിക്ക് മുന്നിലെത്തിയ ദാമ്പത്യ തർക്കങ്ങളിൽ 95 ശതമാനത്തിലധികവും 2020-2022 കാലയളവിൽ വിവാഹിതരായ ദമ്പതികളുടേതാണെന്ന് ഹൈക്കോടതി ചൂണ്ടിക്കാട്ടി. ഇവരിൽ ഭൂരിഭാഗം ആളുകളുടെയും ദാമ്പത്യം ആറു മുതൽ ഒൻപത് മാസം വരെ മാത്രമേ നീണ്ടുനിന്നുള്ളൂ എന്നതും ശ്രദ്ധേയമാണ്. ലോക്ക്ഡൗൺ സമയത്ത് ദമ്പതികൾ ഒരേ വീട്ടിൽ മുഴുവൻ സമയവും ചെലവഴിച്ചപ്പോൾ പരസ്പരമുള്ള സ്വഭാവ വൈപരീത്യങ്ങൾ തുറന്നുകാട്ടപ്പെട്ടതും, പാൻഡെമിക് സൃഷ്ടിച്ച ഭാവി അനിശ്ചിതത്വങ്ങളും മാനസിക സമ്മർദ്ദങ്ങളുമാണ് ബന്ധങ്ങൾ തകരാൻ പ്രധാന കാരണമായതെന്ന് കോടതി വിലയിരുത്തി.
ഈ കാലയളവിലെ വൈവാഹിക തർക്കങ്ങളെ ഒരു പ്രത്യേക വിഭാഗമായി പരിഗണിച്ച് പരിഹാരം കാണാൻ അസാധാരണമായ ചിന്തയും സമീപനവും ആവശ്യമാണെന്ന് കോടതി വ്യക്തമാക്കി. ഇതിന്റെ ഭാഗമായി 2020-2022 കാലഘട്ടത്തിലെ വിവാഹങ്ങളുമായി ബന്ധപ്പെട്ട കേസുകളുടെ വിവരങ്ങൾ ശേഖരിച്ച് നവംബർ 27-ലെ അടുത്ത വാദം കേൾക്കലിന് മുൻപ് സമർപ്പിക്കാൻ തമിഴ്‌നാട്ടിലെ എല്ലാ പ്രിൻസിപ്പൽ ജില്ലാ ജഡ്ജിമാർക്കും കോടതി നിർദ്ദേശം നൽകി. കുടുംബ കോടതി അഭിഭാഷകരുടെ സഹായത്തോടെ കേസുകൾ രമ്യമായി പരിഹരിക്കാനുള്ള ബദൽ മാർഗ്ഗങ്ങൾ തേടുമെന്നും ഹൈക്കോടതി അറിയിച്ചു.