കോട്ടയം: വാഹനാപകടത്തിൽ കൊല്ലപ്പെട്ട പ്രശസ്ത സിനിമ-ടെലിവിഷൻ താരം കൊല്ലം സുധിയുടെ കുടുംബത്തിന് അർഹമായ നഷ്ടപരിഹാരം വിധിച്ച് കോടതി. ഇൻഷുറൻസ് കമ്പനി 1.77 കോടി രൂപ നഷ്ടപരിഹാരമായി നൽകണമെന്ന് കോട്ടയം എം.എ.സി.ടി കോടതി ഉത്തരവിട്ടു. കൊല്ലം സുധിയുടെ ഭാര്യ, അമ്മ, രണ്ട് മക്കൾ എന്നിവരാണ് ഈ തുകയ്ക്ക് അർഹരായ നിയമപരമായ അവകാശികൾ. നീണ്ടകാലമായി കോടതിയുടെ പരിഗണനയിലുണ്ടായിരുന്ന കേസിൽ വിശദമായ വാദപ്രതിവാദങ്ങൾക്കും പരിശോധനകൾക്കും ശേഷമാണ് നിർണ്ണായക വിധി വന്നിട്ടുള്ളത്. ഉത്തരവിന്റെ കൂടുതൽ വിശദാംശങ്ങൾ പുറത്തുവരാനുണ്ട്.
2023 ജൂൺ 5-ന് തൃശൂരിലെ കൈപ്പമംഗലത്തുവെച്ചുണ്ടായ കാർ അപകടത്തിലാണ് കൊല്ലം സുധി മരണപ്പെടുന്നത്. മിമിക്രി വേദികളിലൂടെയും സിനിമകളിലൂടെയും ഏറെ ജനപ്രീതി നേടിയ താരം, അപകടദിവസം രാത്രി മറ്റ് മൂന്ന് സഹപ്രവർത്തകർക്കൊപ്പം സഞ്ചരിക്കുകയായിരുന്നു. ഇവർ സഞ്ചരിച്ചിരുന്ന കാർ എതിരെ വന്ന പിക്കപ്പ് ട്രക്കുമായി കൂട്ടിയിടിച്ചാണ് അപകടമുണ്ടായത്. ഗുരുതരമായി പരിക്കേറ്റ സുധിയെ ഉടൻ തന്നെ കൊടുങ്ങല്ലൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായിരുന്നില്ല.