ബോളിവുഡ് താരം ആമിർ ഖാനെ വധിക്കുന്നവർക്ക് 5 കോടി രൂപ പാരിതോഷികം പ്രഖ്യാപിച്ച് അയോധ്യയിലെ മതനേതാവ് ജഗദ്ഗുരു പരമഹംസ് ആചാര്യ രംഗത്തെത്തിയത് വലിയ വിവാദമായിരിക്കുകയാണ്. ആമിർ ഖാനും ദീർഘകാല പങ്കാളിയായ ഗൗരി സ്പ്രാട്ടും തമ്മിൽ മുംബൈയിൽ നടന്ന ലളിതമായ രജിസ്റ്റർ വിവാഹത്തിന് പിന്നാലെയാണ് ഈ ഭീഷണി. റീന ദത്ത, കിരൺ റാവു എന്നിവരുമായുള്ള മുൻ വിവാഹബന്ധങ്ങൾ വേർപെടുത്തിയ ശേഷം നടന്ന ഈ മൂന്നാം വിവാഹത്തെ ചുറ്റിപ്പറ്റിയാണ് ഇപ്പോൾ ശക്തമായ പ്രതിഷേധങ്ങൾ ഉയരുന്നത്.
ആമിർ ഖാന്റെ വിവാഹത്തിനെതിരെ മഹാരാഷ്ട്ര മന്ത്രി നിതേഷ് റാണെ ഉൾപ്പെടെയുള്ളവർ രൂക്ഷ വിമർശനവുമായി രംഗത്തെത്തിയിരുന്നു. ആമിർ ഖാനെ ‘ലവ് ജിഹാദിന്റെ ബ്രാൻഡ് അംബാസഡർ’ എന്ന് വിശേഷിപ്പിച്ച റാണെയെ പിന്തുണച്ചാണ് പരമഹംസ് ആചാര്യയുടെ പ്രഖ്യാപനം വന്നത്. ഹിന്ദു സ്ത്രീകളെ വിവാഹം കഴിച്ച് ‘ലവ് ജിഹാദ്’ പ്രോത്സാഹിപ്പിക്കുന്നുവെന്ന് ആരോപിച്ച്, വധശിക്ഷ നടത്തുന്ന ആൾക്ക് 5 കോടി രൂപ പാരിതോഷികവും കുടുംബത്തിന് സഹായവും നിയമനടപടികൾക്കുള്ള ചെലവും വഹിക്കുമെന്ന് അദ്ദേഹം പരസ്യമായി പ്രഖ്യാപിക്കുകയായിരുന്നു.
ഈ വിവാഹത്തിനെതിരെ ബജ്രംഗ് ദൾ പ്രവർത്തകർ പ്രതിഷേധവുമായി തെരുവിലിറങ്ങിയിരുന്നു. ആമിർ ഖാന്റെ കോലം കത്തിക്കുകയും അദ്ദേഹത്തിനെതിരെ നടപടി ആവശ്യപ്പെടുകയും ചെയ്തു. രണ്ട് മുതിർന്ന വ്യക്തികൾ പരസ്പര സമ്മതത്തോടെ നിയമപരമായി നടത്തിയ വിവാഹമായിട്ടുപോലും, ഇതിനെ വർഗീയ അജണ്ടകളുടെ പേരിൽ ചോദ്യം ചെയ്യുന്നത് വലിയ സാമൂഹിക ചർച്ചകൾക്ക് വഴിവെച്ചിരിക്കുകയാണ്.
അതേസമയം, ഒരു വ്യക്തിയെ വധിക്കാൻ പരസ്യമായി പണം വാഗ്ദാനം ചെയ്തതിനെതിരെ നിയമവിദഗ്ധരും പൗരാവകാശ പ്രവർത്തകരും ശക്തമായി രംഗത്തെത്തിയിട്ടുണ്ട്. ഇത്തരം പ്രസ്താവനകൾ അക്രമത്തിന് പ്രേരിപ്പിക്കുന്നതും രാജ്യത്തെ നിയമവാഴ്ചയ്ക്ക് ഭീഷണിയുമാണെന്ന് അവർ ചൂണ്ടിക്കാട്ടുന്നു. ഭരണഘടന ഉറപ്പുനൽകുന്ന ജീവിക്കാനുള്ള അവകാശത്തെയും വ്യക്തിസ്വാതന്ത്ര്യത്തെയും ഇത്തരം ഭീഷണികൾ കാറ്റിൽ പറത്തുകയാണെന്നും, അക്രമങ്ങൾക്കെതിരെ കർശന നടപടി വേണമെന്നും വിവിധ കോണുകളിൽ നിന്ന് ആവശ്യം ഉയരുന്നുണ്ട്.