മൂത്രമൊഴിക്കുമ്പോൾ അനുഭവപ്പെട്ട കടുത്ത വേദനയും മൂത്രത്തിൽ രക്തവും (ഹെമറ്റൂറിയ) മൂലമാണ് 35 വയസ്സുള്ള ഒരു യുവാവ് ചൈനയിലെ ഹുനാൻ പ്രൊവിൻഷ്യൽ പീപ്പിൾസ് ആശുപത്രിയിൽ ചികിത്സ തേടിയെത്തിയത്. എന്നാൽ പരിശോധനയ്ക്കിടയിൽ രോഗിയുടെ ഹൃദയത്തിനുള്ളിൽ 36 മില്ലീമീറ്റർ (1.4 ഇഞ്ച്) നീളമുള്ള തയ്യൽ സൂചി കുടുങ്ങിക്കിടക്കുന്നത് കണ്ട ഡോക്ടർമാർ അത്ഭുതപ്പെട്ടു. ഹൃദയസംബന്ധമായ യാതൊരു ലക്ഷണങ്ങളോ ബുദ്ധിമുട്ടുകളോ കാണിക്കാതെ ഇത്രയും വലിയൊരു ലോഹവസ്തു ഉള്ളിലിരുന്ന് ഹൃദയം സാധാരണ പോലെ പ്രവർത്തിച്ചു എന്നതാണ് ഈ കേസിനെ കൂടുതൽ വിചിത്രമാക്കുന്നത്.
മെഡിക്കൽ ഇമേജിംഗിൽ ഹൃദയത്തിന് സമീപം ദുരൂഹമായ ഒരു നിഴൽ കണ്ടതിനെ തുടർന്ന് ഇയാളുടെ നെഞ്ച്, വയറ്, പെൽവിസ് എന്നിവയുടെ സിടി സ്കാൻ നടത്തി. സ്കാനിംഗിൽ ഹൃദയത്തിൽ മാത്രമല്ല, ശരീരത്തിന്റെ വിവിധ ഭാഗങ്ങളിലായി നിരവധി ലോഹവസ്തുക്കൾ തറച്ചുകയറിയതായി കണ്ടെത്തി. വയറിലെ മതിൽ, പെൽവിസ്, മൂത്രസഞ്ചി മതിൽ, ഇടുപ്പ് അസ്ഥി, പേശികൾ, ലിംഗം എന്നിവയിലെല്ലാം സൂചികൾ കുടുങ്ങിക്കിടപ്പുണ്ടായിരുന്നു. ഇതിൽ ഏറ്റവും അപകടകരമായത് ഹൃദയത്തിന്റെ സംരക്ഷണ സഞ്ചിയായ പെരികാർഡിയത്തിൽ തുളച്ചുകയറി ഇടത് വെൻട്രിക്കിളിലേക്ക് നീണ്ടുനിന്ന സൂചിയായിരുന്നു.
സൂചി നീങ്ങി ഹൃദയം പൊട്ടുകയോ കടുത്ത രക്തസ്രാവവും അണുബാധയും ഉണ്ടാകുകയോ ചെയ്യുമെന്ന ഭയത്താൽ ഡോക്ടർമാർ ഉടൻ തന്നെ ശസ്ത്രക്രിയയ്ക്ക് മുതിർന്നു. ശസ്ത്രക്രിയയിൽ ആദ്യം ഹൃദയത്തിലെ വസ്തു നീക്കം ചെയ്ത ശേഷമാണ് മറ്റ് ഭാഗങ്ങളിലെ സൂചികൾ നീക്കിയത്. മൂത്രസഞ്ചിയിലുണ്ടായിരുന്ന ചില സൂചികൾക്ക് മുകളിൽ കല്ല് പോലെയുള്ള അവശിഷ്ടങ്ങൾ അടിഞ്ഞുകൂടിയ നിലയിലായിരുന്നു, ഇത് അവ വർഷങ്ങളായി ശരീരത്തിനുള്ളിൽ ഉണ്ടായിരുന്നു എന്നതിന് തെളിവാണ്. ശസ്ത്രക്രിയ വിജയകരമായി പൂർത്തിയായതോടെ രോഗി പൂർണ്ണ സുഖം പ്രാപിച്ചു.
ശരീരത്തിൽ ഇത്രയധികം സൂചികൾ എങ്ങനെ പ്രവേശിച്ചു എന്ന കാര്യത്തിൽ ഇപ്പോഴും കൃത്യമായ വിശദീകരണം ലഭിച്ചിട്ടില്ല.ബുദ്ധിപരമായ വൈകല്യമുള്ള ഈ യുവാവിനോ കുടുംബത്തിനോ ഇതിനെക്കുറിച്ച് ഒന്നും പറയാൻ കഴിഞ്ഞിട്ടില്ല. എന്നാൽ രണ്ട് വർഷം മുമ്പ് ഇയാളുടെ വയറ്റിൽ നിന്ന് ഇതുപോലെ രണ്ടു സൂചികൾ നീക്കം ചെയ്തിരുന്നതായി മെഡിക്കൽ ചരിത്രം വ്യക്തമാക്കുന്നു.മനഃപൂർവ്വം സ്വന്തം ശരീരത്തിലേക്ക് വസ്തുക്കൾ തിരുകുന്ന ‘സ്വയം ഉൾച്ചേർക്കൽ ശീലം’ ആകാം ഇതിന് കാരണമെന്നാണ് ഡോക്ടർമാർ അനുമാനിക്കുന്നത്.