തദ്ദേശ തിരഞ്ഞെടുപ്പ് അടുത്തിരിക്കെ എറണാകുളം ബിജെപി നേതൃത്വത്തിൽ ആഭ്യന്തര കലഹം രൂക്ഷമാകുന്നു. മൂന്ന് പതിറ്റാണ്ടിലേറെയായി കൊച്ചി കോർപ്പറേഷൻ കൗൺസിലറായി പ്രവർത്തിച്ച ബിജെപി മുൻ സംസ്ഥാന വൈസ് പ്രസിഡന്റ് ശ്യാമള എസ്. പ്രഭുവാണ് ജില്ലാ നേതൃത്വവുമായി ഇടഞ്ഞിരിക്കുന്നത്. തനിക്ക് സീറ്റ് നിഷേധിക്കപ്പെട്ടാൽ, വിമത സ്ഥാനാർത്ഥിയായി മത്സരിക്കും എന്ന് ശ്യാമള എസ്. പ്രഭു പ്രമുഖ മാധ്യമത്തോട് വ്യക്തമാക്കി. ഈ ഭീഷണി എറണാകുളത്തെ ബിജെപിക്ക് തിരഞ്ഞെടുപ്പിൽ വലിയ വെല്ലുവിളിയായേക്കും.
1988 മുതൽ തുടർച്ചയായി ആറ് തവണ മട്ടാഞ്ചേരി ചെറളായി ഡിവിഷനിൽ നിന്ന് കോർപ്പറേഷനിലേക്ക് തിരഞ്ഞെടുക്കപ്പെട്ട ചരിത്രമുണ്ട് അവർക്ക്. എന്നാൽ, തന്നെ ഇപ്പോഴത്തെ നേതൃത്വം തഴയുകയാണെന്ന് അവർ ആരോപിക്കുന്നു. 2015-ൽ തനിക്കെതിരെ വിമതനായി മത്സരിച്ചവരും അന്ന് അവർക്ക് പിന്തുണ നൽകി നടപടി നേരിട്ടവരുമാണ് ഇപ്പോൾ ബിജെപിയുടെ മട്ടാഞ്ചേരി മണ്ഡലം ഭാരവാഹികളായിരിക്കുന്നതെന്നും, ഇതാണ് തനിക്ക് സീറ്റ് നിഷേധിക്കപ്പെടാൻ കാരണമെന്നും ശ്യാമള എസ്. പ്രഭു ചൂണ്ടിക്കാട്ടി.
പുതുതലമുറയ്ക്ക് അവസരം നൽകാനായിട്ടാണ് കഴിഞ്ഞ തദ്ദേശ തിരഞ്ഞെടുപ്പിൽ താൻ മത്സരിക്കാതെ മാറിനിന്നതെന്ന് ശ്യാമള എസ്. പ്രഭു വ്യക്തമാക്കി. എന്നാൽ, ഇപ്പോഴത്തെ സാഹചര്യത്തിൽ കൂടുതൽ അപമാനം സഹിച്ച് പാർട്ടിയിൽ തുടരേണ്ടതില്ല എന്ന് തീരുമാനിച്ചതിനാലാണ് ഇത്തവണ സീറ്റ് നിഷേധിക്കപ്പെട്ടാൽ വിമത സ്ഥാനാർത്ഥിയായി മത്സരിക്കാൻ തീരുമാനിച്ചതെന്നും അവർ കൂട്ടിച്ചേർത്തു.
ബിജെപിയിൽ ചേരിപ്പോര് രൂക്ഷമായി തുടരുന്നതിനിടെ, ബിഎംഎസ് നേതാവായ ആർ. സതീശും പ്രാദേശിക നേതൃത്വത്തിന്റെ ‘കൊള്ളരുതായ്മകൾക്കെതിരെ’ ഫ്ലെക്സ് ബോർഡുകളുയർത്തി ഒറ്റയാൾ പോരാട്ടം ആരംഭിച്ചിരിക്കുകയാണ്. മുതിർന്ന നേതാക്കളായ ശ്യാമള എസ്. പ്രഭുവിനെപ്പോലെ പ്രമുഖർ നേതൃത്വവുമായി അകലുന്നത് തദ്ദേശ തിരഞ്ഞെടുപ്പ് അടുത്തിരിക്കെ ബിജെപിക്ക് വലിയ വെല്ലുവിളിയാണ് സൃഷ്ടിക്കുന്നത്.