സംസ്ഥാനത്ത് യുഡിഎഫ് തരംഗം, വട്ടിയൂർക്കാവിൽ ഇഞ്ചോടിഞ്ച് പോരാട്ടം; പാലക്കാട് ശോഭ സുരേന്ദ്രൻ മുന്നിൽ

തിരുവനന്തപുരം വട്ടിയൂർക്കാവ് മണ്ഡലത്തിൽ ആദ്യ റൗണ്ട് വോട്ടുകൾ എണ്ണിക്കഴിഞ്ഞപ്പോൾ എൽഡിഎഫ് സ്ഥാനാർത്ഥി വി.കെ. പ്രശാന്തും യുഡിഎഫിന്റെ കെ. മുരളീധരനും തമ്മിൽ കടുത്ത പോരാട്ടമാണ് നടക്കുന്നത്. വി.കെ. പ്രശാന്ത് 2630 വോട്ടുകൾ നേടിയപ്പോൾ 2533 വോട്ടുകളുമായി മുരളീധരൻ തൊട്ടുപിന്നാലെയുണ്ട്. നിലവിൽ 97 വോട്ടുകളുടെ നേരിയ ലീഡാണ് പ്രശാന്തിനുള്ളത്. അതേസമയം, പാലക്കാട് മണ്ഡലത്തിൽ ബിജെപി സ്ഥാനാർത്ഥി ശോഭ സുരേന്ദ്രൻ 6834 വോട്ടുകളുടെ വലിയ ലീഡുമായി മുന്നേറുന്നത് ശ്രദ്ധേയമാണ്. സംസ്ഥാനത്തെ മൊത്തം ചിത്രം പരിശോധിക്കുമ്പോൾ യുഡിഎഫ് തരംഗമാണ് ദൃശ്യമാകുന്നത്. രാവിലെ 9:30 വരെയുള്ള കണക്കുകൾ പ്രകാരം 97 സീറ്റുകളിൽ യുഡിഎഫ് മുന്നിട്ടുനിൽക്കുമ്പോൾ, എൽഡിഎഫ് 39 സീറ്റുകളിലേക്ക് ഒതുങ്ങിയിരിക്കുകയാണ്. അഞ്ച് മണ്ഡലങ്ങളിൽ എൻഡിഎയും ലീഡ് നിലനിർത്തുന്നുണ്ട്. ഇടതുകോട്ടകളിൽ പോലും യുഡിഎഫ് ആധിപത്യം ഉറപ്പിക്കുന്ന കാഴ്ചയാണ് വോട്ടെണ്ണൽ ഒന്നര മണിക്കൂർ പിന്നിടുമ്പോൾ കാണാൻ സാധിക്കുന്നത്.