ശബരിമല സ്വർണ്ണക്കൊള്ളക്കേസിൽ അറസ്റ്റിലായ തന്ത്രി കണ്ഠരര് രാജീവരരുടെ ആലപ്പുഴ ചെങ്ങന്നൂരിലെ വീട്ടിൽ (താഴമൺ മഠം) പ്രത്യേക അന്വേഷണസംഘം (SIT) മിന്നൽ പരിശോധന നടത്തി. ശനിയാഴ്ച ഉച്ചയ്ക്ക് രണ്ടരയോടെയാണ് ഫോറൻസിക് വിദഗ്ധരടങ്ങുന്ന സംഘം മഠത്തിലെത്തിയത്. കേസിൽ വെള്ളിയാഴ്ച അറസ്റ്റിലായ തന്ത്രിയെ കോടതി റിമാൻഡ് ചെയ്തതിന് പിന്നാലെയാണ് നിർണ്ണായകമായ ഈ നീക്കം.
കേസിലെ മറ്റൊരു പ്രതിയായ ഉണ്ണികൃഷ്ണൻ പോറ്റിയെ തനിക്ക് അറിയാമെങ്കിലും താൻ നിരപരാധിയാണെന്നായിരുന്നു രാജീവരരുടെ ആദ്യ നിലപാട്. എന്നാൽ, അന്വേഷണത്തിൽ ലഭിച്ച കൂടുതൽ തെളിവുകളുടെ അടിസ്ഥാനത്തിലാണ് പോലീസ് അറസ്റ്റിലേക്ക് കടന്നത്.
അതേസമയം, റിമാൻഡിലായ തന്ത്രി കണ്ഠരര് രാജീവരരെ ആരോഗ്യപ്രശ്നങ്ങളെ തുടർന്ന് തിരുവനന്തപുരം മെഡിക്കൽ കോളേജ് ഐസിയുവിൽ പ്രവേശിപ്പിച്ചു. പരിശോധനകൾക്കിടെ ദേഹാസ്വാസ്ഥ്യം അനുഭവപ്പെട്ടതിനെ തുടർന്നാണ് വിദഗ്ധ ചികിത്സയ്ക്കായി അദ്ദേഹത്തെ മാറ്റിയത്.