ശബരിമല സ്വർണ്ണക്കൊള്ളക്കേസിൽ അതീവ നിർണ്ണായകമായ അന്തിമ ശാസ്ത്രീയ റിപ്പോർട്ട് പ്രത്യേക അന്വേഷണ സംഘത്തിന് (SIT) ലഭിച്ചു. ശ്രീകോവിലിന്റെ കട്ടിളപ്പാളികൾ പ്രതികൾ മാറ്റിയിട്ടില്ലെന്നും, പകരം അതിൽ പൂശിയിരുന്ന സ്വർണ്ണം മാത്രമാണ് തട്ടിയെടുത്തിട്ടുള്ളതെന്നുമാണ് ജംഷഡ്പൂരിലെ ലാബിൽ നിന്ന് ലഭിച്ച പരിശോധനാ ഫലം സൂചിപ്പിക്കുന്നത്. ദ്വാരപാലക ശിൽപ്പപാളി, കട്ടിളപ്പാളി എന്നിവയിൽ നിന്ന് ശേഖരിച്ച എട്ട് സാമ്പിളുകളുടെ വിശദമായ പരിശോധനയ്ക്ക് ശേഷമാണ് ഈ സുപ്രധാന കണ്ടെത്തൽ ഉണ്ടായിരിക്കുന്നത്. അന്വേഷണത്തിൽ വലിയ വഴിത്തിരിവായ ഈ ശാസ്ത്രീയ റിപ്പോർട്ട് എസ്.ഐ.ടി കൊല്ലം കോടതിയിൽ സമർപ്പിച്ചിട്ടുണ്ട്. ഈ പുതിയ വിവരങ്ങളുടെ അടിസ്ഥാനത്തിൽ കേസിന്റെ കുറ്റപത്രം ഉടൻ തന്നെ കോടതിയിൽ സമർപ്പിക്കുമെന്നാണ് സൂചന.