ജനപ്രിയ പ്ലാറ്റ്‌ഫോമായ ഗൂഗിൾ എർത്തിന് കൂടുതൽ മികച്ച മുഖം നൽകാനൊരുങ്ങി ടെക് ഭീമനായ ഗൂഗിൾ. വെള്ളപ്പൊക്കം, വരൾച്ച, കാട്ടുതീ തുടങ്ങിയ പ്രകൃതി ദുരന്തങ്ങൾ കൃത്യമായി മനസ്സിലാക്കാനും അവ കൈകാര്യം ചെയ്യാനും സഹായിക്കുന്നതിനായി ജെമിനി എഐ മോഡലുകൾ ഗൂഗിൾ എർത്തിൽ സംയോജിപ്പിച്ചിരിക്കുകയാണ് കമ്പനി. ഗൂഗിളിന്റെ ഈ പുതിയ നീക്കം എർത്ത് എഐ പ്ലാറ്റ്‌ഫോമിനെ പുതിയ തലത്തിലേക്ക് ഉയർത്തുന്നതാണ്. ഉപഗ്രഹ ചിത്രങ്ങൾ, കാലാവസ്ഥാ വിവരങ്ങൾ, ജനസംഖ്യാ ഭൂപടങ്ങൾ എന്നിവ ഒരുമിച്ച് ചേർത്ത് ഭൂമിയിലെ മാറ്റങ്ങൾ തത്സമയം നിരീക്ഷിക്കാൻ ഇത് ഗവേഷകരെയും സാധാരണക്കാരെയും സഹായിക്കും.
ദുരന്ത പ്രതികരണം വേഗത്തിലാകും
ജെമിനി എഐ ഉപയോഗിക്കുന്നതിലൂടെ ദുരന്ത പ്രതികരണ ആസൂത്രണം വളരെ വേഗത്തിൽ സാധ്യമാകും. വർഷങ്ങൾ നീണ്ടുനിന്ന സങ്കീർണ്ണമായ വിശകലനങ്ങൾ ഇപ്പോൾ മിനിറ്റുകൾക്കുള്ളിൽ പൂർത്തിയാക്കാൻ സാധിക്കും. ഇത് അടിയന്തരഘട്ടങ്ങളിൽ രക്ഷാപ്രവർത്തന സംഘങ്ങളെ അതിവേഗം പ്രവർത്തിക്കാൻ സഹായിക്കുന്നു. പ്രതിസന്ധി കൈകാര്യം ചെയ്യുന്നതിനുള്ള സ്വന്തം പരിഹാരങ്ങൾ നിർമ്മിക്കാൻ ഡെവലപ്പർമാർക്കും വിശകലന വിദഗ്ധർക്കും ഗൂഗിൾ എർത്ത് പ്രൊഫഷണലിലും ഗൂഗിൾ ക്ലൗഡിലും ഈ എഐ സംവിധാനം ഉപയോഗിക്കാനാകും.
ഗൂഗിളിന്റെ വെള്ളപ്പൊക്ക പ്രവചന സംവിധാനം ഇപ്പോൾ ലോകമെമ്പാടുമുള്ള രണ്ട് ബില്യണിലധികം ആളുകളിലേക്ക് എത്തുന്നുണ്ടെന്ന് കമ്പനി അവകാശപ്പെടുന്നു. ആവശ്യമുള്ള സമയങ്ങളിൽ ഭക്ഷണത്തിൻ്റെയും ശുദ്ധജലത്തിൻ്റെയും വിതരണം മികച്ച രീതിയിൽ ആസൂത്രണം ചെയ്യാൻ വേൾഡ് വിഷൻ പോലുള്ള സംഘടനകളെ ഇത് സഹായിച്ചിട്ടുണ്ട്. 2025 ലെ കാലിഫോർണിയയിലെ കാട്ടുതീ സമയത്ത്, ഗൂഗിൾ മാപ്‌സും ക്രൈസിസ് അലേർട്ടുകളും 15 ദശലക്ഷം ആളുകളെ യഥാസമയം സുരക്ഷിത ഷെൽട്ടറുകളിൽ എത്തിക്കാൻ സഹായിച്ചതായും കമ്പനി കൂട്ടിച്ചേർത്തു.
പുതിയ ‘ജിയോസ്പേഷ്യൽ റീസണിംഗ്’: ദുരിതാശ്വാസ പ്രവർത്തനങ്ങൾക്ക് കൃത്യമായ ദിശാബോധം നൽകും
ഗൂഗിൾ എർത്തിൽ സംയോജിപ്പിച്ച ജെമിനി എഐയുടെ പ്രധാന സവിശേഷതയാണ് പുതിയ ജിയോസ്പേഷ്യൽ റീസണിംഗ് (Geospatial Reasoning) ഫീച്ചർ. കാലാവസ്ഥ, ജനസംഖ്യാ കണക്കുകൾ, ഉപഗ്രഹ ഇമേജറി എന്നിങ്ങനെ വിവിധ ഡാറ്റാ സ്രോതസ്സുകൾ സംയോജിപ്പിച്ചുകൊണ്ട് സമഗ്രമായ വിശകലനം നടത്താൻ ഈ ഫീച്ചറിന് സാധിക്കും. ഒരു കൊടുങ്കാറ്റോ വെള്ളപ്പൊക്കമോ ഏറ്റവും കൂടുതൽ ബാധിക്കാൻ സാധ്യതയുള്ള പ്രദേശങ്ങൾ ഏതൊക്കെയെന്ന് കൃത്യമായി നിർണയിക്കാൻ ഇത് സഹായിക്കും. തൽഫലമായി, ദുരിതാശ്വാസ പ്രവർത്തനങ്ങളും സഹായ വിതരണവും ആദ്യം എവിടെ തുടങ്ങണം എന്ന് നിശ്ചയിക്കാൻ ഇത് ദുരിതാശ്വാസ ഏജൻസികളെയും സ്ഥാപനങ്ങളെയും സഹായിക്കും.