ചലച്ചിത്ര അക്കാദമി അധ്യക്ഷ സ്ഥാനത്തുനിന്നും നീക്കിയതിനെതിരെ പരസ്യമായി അതൃപ്തി പ്രകടിപ്പിച്ച നടൻ പ്രേംകുമാറിനെ അനുനയിപ്പിക്കാൻ സി.പി.എം നീക്കം സജീവമാക്കി. ഇതിന്റെ ഭാഗമായി പാർട്ടി നേതാവ് കടകംപള്ളി സുരേന്ദ്രൻ പ്രേംകുമാറിന്റെ തിരുവനന്തപുരത്തെ വീട്ടിലെത്തിയെങ്കിലും കൂടിക്കാഴ്ച സാധ്യമായില്ല. കടകംപള്ളി എത്തിയ സമയത്ത് പ്രേംകുമാർ വീട്ടിൽ ഇല്ലാത്തതിനാലാണ് അദ്ദേഹം മടങ്ങിയത്. അപ്രതീക്ഷിതമായി തന്നെ സ്ഥാനത്തുനിന്നും മാറ്റിയ നടപടിയിൽ തനിക്ക് നീതികേട് നേരിട്ടതായി പ്രേംകുമാർ നേരത്തെ വിമർശിച്ചിരുന്നു.
സാഹിത്യ അക്കാദമി അധ്യക്ഷൻ കെ. സച്ചിദാനന്ദൻ സർക്കാരിനെതിരെ പരസ്യ വിമർശനം ഉന്നയിച്ചിട്ടും അദ്ദേഹത്തെ മാറ്റാത്തതും, തന്നെ പുറത്താക്കിയതും ചൂണ്ടിക്കാട്ടി ‘ഇരട്ടനീതി’ എന്നാണ് പ്രേംകുമാർ ഈ സംഭവത്തെ വിശേഷിപ്പിച്ചത്. ഇടത് തുടർഭരണം പാടില്ലെന്ന സച്ചിദാനന്ദന്റെ പ്രസ്താവന ചർച്ചയാകുമ്പോൾ തന്നെ നീക്കിയതിലെ അമർഷമാണ് താരം പങ്കുവെച്ചത്. പാർട്ടിയും സർക്കാരും അദ്ദേഹത്തെ ശാന്തനാക്കാനുള്ള ശ്രമങ്ങൾ തുടരുന്നതിനിടയിലാണ് പുതിയ സംഭവവികാസങ്ങൾ.