തെന്നിന്ത്യൻ സൂപ്പർതാരം അല്ലു അർജുൻ ഋഷഭ് ഷെട്ടി സംവിധാനം ചെയ്ത് അഭിനയിച്ച ‘കാന്താര ചാപ്റ്റർ 1’ നെ പ്രശംസിച്ച് രംഗത്തെത്തി. “കൊള്ളാം എന്തൊരു മനസ്സ് നിറഞ്ഞ സിനിമയാണത്,” എന്ന് കുറിച്ച അദ്ദേഹം ചിത്രത്തെ വിവരിക്കാൻ വാക്കുകൾ ഇല്ലെന്നും കൂട്ടിച്ചേർത്തു. രചയിതാവ് സംവിധായകൻ നടൻ എന്നീ നിലകളിൽ ‘വൺമാൻ ഷോ’ നടത്തിയ ഋഷഭ് ഷെട്ടിയെ അല്ലു അർജുൻ അഭിനന്ദിച്ചു. രുക്മിണി വസന്ത്, ജയറാം, ഗുൽഷൻ ദേവയ്യ എന്നിവരുടെ സൗന്ദര്യാത്മക പ്രകടനങ്ങളെയും, അജനീഷ് ലോക്നാഥിന്റെ സംഗീതം, അരവിന്ദ് എസ്. കശ്യപിന്റെ ഛായാഗ്രഹണം, ധരണി ഗംഗേപുത്രന്റെ കലാസംവിധാനം, അർജുന്റെ സ്റ്റണ്ട് എന്നിവയുൾപ്പെടെയുള്ള സാങ്കേതിക വിദഗ്ദ്ധരുടെ മികച്ച ജോലിയെയും അദ്ദേഹം പ്രത്യേകം പ്രശംസിച്ചു.
കന്നഡ സിനിമകളെ അപേക്ഷിച്ച് കുറഞ്ഞ ബഡ്ജറ്റിൽ ബിഗ് സ്ക്രീനിൽ എത്തിയ ‘കാന്താര’യുടെ ആദ്യഭാഗം മികച്ച പ്രേക്ഷക പ്രതികരണം നേടുകയും തുടർന്ന് സൂപ്പർ ഡ്യൂപ്പർ ഹിറ്റായി മാറുകയും ചെയ്തിരുന്നു. ഇതിന്റെ ഹിന്ദി, തെലുങ്ക്, തമിഴ്, മലയാളം, ഇംഗ്ലീഷ്, തുളു പതിപ്പുകൾ പുറത്തിറങ്ങുകയും ബോക്സ്ഓഫീസിൽ മികച്ച കളക്ഷൻ നേടുകയും ചെയ്തു. അതേസമയം കാന്താര ചാപ്റ്റർ 1ന്റെ ഇംഗ്ലീഷ് പതിപ്പ് ഒക്ടോബർ 31-ന് തിയേറ്ററുകളിൽ റിലീസിനൊരുങ്ങുകയാണ്. ഹോംബാലെ ഫിലിംസ് നിർമ്മിക്കുന്ന ‘കാന്താര 2’ന്റെ കേരളത്തിലെ വിതരണം പൃഥ്വിരാജ് പ്രൊഡക്ഷൻസാണ് ഏറ്റെടുത്തിരിക്കുന്നത്.