രാജ്യത്ത് വാഹനങ്ങളുടെ തേർഡ് പാർട്ടി മോട്ടോർ ഇൻഷുറൻസ് പ്രീമിയം നിരക്കുകൾ ഉടൻ ഉയർന്നേക്കും. കഴിഞ്ഞ നാല് വർഷമായി മാറ്റമില്ലാതെ തുടരുന്ന നിരക്കുകൾ വർദ്ധിപ്പിക്കണമെന്ന് ആവശ്യപ്പെട്ട് ജനറൽ ഇൻഷുറൻസ് കമ്പനികൾ സമ്മർദ്ദം ചെലുത്തുകയാണ്. അവസാനമായി 2022 ജൂണിലാണ് തേർഡ് പാർട്ടി പ്രീമിയം നിരക്കുകൾ പുതുക്കിയത്. കോവിഡ് കാലത്തെ സാമ്പത്തിക പ്രയാസങ്ങൾ കണക്കിലെടുത്ത് പിന്നീട് മാറ്റമൊന്നും വരുത്തിയിരുന്നില്ല.
ഇന്ത്യയിലെ 1.08 ലക്ഷം കോടിയുടെ മോട്ടോർ ഇൻഷുറൻസ് വിപണിയിൽ 60 ശതമാനവും (64,200 കോടി) തേർഡ് പാർട്ടി ഇൻഷുറൻസാണ്. എന്നാൽ അണ്ടർറൈറ്റിംഗ് നഷ്ടം കമ്പനികൾക്ക് വൻതോതിൽ വർദ്ധിക്കുന്നുണ്ട്. (ഉദാഹരണത്തിന്, ന്യൂ ഇന്ത്യ അഷ്വറൻസിന് മാത്രം അണ്ടർറൈറ്റിംഗ് നഷ്ടം 57 ശതമാനം വർദ്ധിച്ച് 1,297.2 കോടിയായി). 2026 ജൂണിൽ സുപ്രീം കോടതി പുറപ്പെടുവിച്ച വിധി പ്രകാരം, അപകടങ്ങളിൽപ്പെടുന്ന വീട്ടമ്മമാരുടെ വേതനമില്ലാത്ത ഗാർഹിക ജോലിയുടെ സാമ്പത്തിക മൂല്യം കണക്കാക്കി നഷ്ടപരിഹാരം നൽകണം. ഇത് ഇൻഷുറൻസ് കമ്പനികളുടെ ക്ലെയിം തുകകളിൽ വലിയ വർദ്ധനവുണ്ടാക്കി.
എല്ലാ വാഹന വിഭാഗങ്ങൾക്കും ഒരേപോലെയല്ലാതെ, ഓരോ വിഭാഗത്തിന്റെയും ക്ലെയിം അനുപാതം വിലയിരുത്തിയാകും പ്രീമിയം നിശ്ചയിക്കുക. തേർഡ് പാർട്ടി പ്രീമിയത്തിൽ 10 മുതൽ 15 ശതമാനം വരെ വർദ്ധനവ് പ്രതീക്ഷിക്കുന്നു. എന്നാൽ ഇത് മൊത്തം ഇൻഷുറൻസ് പ്രീമിയത്തിൽ 4 മുതൽ 8 ശതമാനം വരെ മാത്രമേ പ്രതിഫലിക്കൂ. ഉദാഹരണത്തിന്, പ്രതിവർഷം 10,000 ഇൻഷുറൻസ് പ്രീമിയം നൽകുന്ന വാഹനത്തിന് 400 മുതൽ 800 വരെ മാത്രമായിരിക്കും അധിക ബാധ്യത വരുന്നത്. ഇൻഷുറൻസ് റെഗുലേറ്ററി ആൻഡ് ഡെവലപ്മെന്റ് അതോറിറ്റി ഓഫ് ഇന്ത്യ പരിശോധിച്ച് നൽകുന്ന ശുപാർശയുടെ അടിസ്ഥാനത്തിൽ കേന്ദ്ര റോഡ് ഗതാഗത, ഹൈവേ മന്ത്രാലയമായിരിക്കും പുതിയ നിരക്കുകൾ ഔദ്യോഗികമായി പ്രഖ്യാപിക്കുക.