തമിഴ് താരം ധനുഷ് മുംബൈ വിമാനത്താവളത്തിൽ നിന്നുള്ള വീഡിയോ പുറത്തുവന്നതിന് പിന്നാലെ വീണ്ടും ഗോസിപ്പ് കോളങ്ങളിൽ നിറയുന്നു. രണ്ട് യുവതികൾക്കൊപ്പം യാത്ര ചെയ്യുന്ന ധനുഷിന്റെ ദൃശ്യങ്ങൾ സാമൂഹിക മാധ്യമങ്ങളിൽ പ്രചരിച്ചതോടെ, അതിലൊരാൾ താരത്തിന്റെ പുതിയ കാമുകിയാണെന്ന തരത്തിൽ പ്രചാരണങ്ങൾ ശക്തമായിരുന്നു. എന്നാൽ, ഈ വ്യാജ വാർത്തകൾക്ക് പിന്നിലെ യഥാർത്ഥ വസ്തുത ഇപ്പോൾ പുറത്തുവന്നിരിക്കുകയാണ്.
ധനുഷിനൊപ്പമുണ്ടായിരുന്ന യുവതികൾ കാവ്യ ശ്രീറാം, അവന്തിക കനകരാജ് എന്നിവരാണെന്ന് തിരിച്ചറിഞ്ഞിട്ടുണ്ട്. ഇതിൽ അവന്തിക കനകരാജ്, ധനുഷിന്റെ സ്വന്തം നിർമ്മാണ കമ്പനിയായ ‘വുണ്ടർബാർ ഫിലിംസി’ന്റെ ഹെഡ് ഓഫ് ഓപ്പറേഷൻസ് ആയി ജോലി ചെയ്യുന്ന വ്യക്തിയാണ്. കമ്പനിയിലെ ഉന്നത ഉദ്യോഗസ്ഥയാണെന്ന സത്യം നിലനിൽക്കെയാണ് ചില സോഷ്യൽ മീഡിയ പ്രൊഫൈലുകൾ തെറ്റിദ്ധരിപ്പിക്കുന്ന രീതിയിൽ ഇരുവരെയും കൂട്ടിച്ചേർത്ത് വ്യാജവാർത്തകൾ മെനഞ്ഞെടുത്തത്. മുൻപ് ബോളിവുഡ് നടി മൃണാൾ ഠാക്കൂറുമായി ധനുഷിനെ ബന്ധപ്പെടുത്തി വന്ന ഗോസിപ്പുകളോട് ഉപമിച്ചായിരുന്നു പലരും ഈ വീഡിയോയും പങ്കുവെച്ചത്.
യാതൊരു അടിസ്ഥാനവുമില്ലാതെ വ്യക്തിഹത്യ നടത്തുന്ന രീതിയിൽ ഇത്തരം വീഡിയോകൾ പ്രചരിപ്പിച്ചതിനെതിരെ സോഷ്യൽ മീഡിയയിൽ വലിയ വിമർശനമാണ് ഉയരുന്നത്. വുണ്ടർബാർ ഫിലിംസിലെ പ്രൊഫഷണലായ ഉദ്യോഗസ്ഥയുടെ വ്യക്തിത്വത്തെപ്പോലും കണക്കിലെടുക്കാതെ, കേവലം വ്യൂസിന് വേണ്ടി മാത്രം ഇത്തരം വാർത്തകൾ നിർമ്മിക്കുന്നതിനെതിരെ പ്രേക്ഷകർ അമർഷം രേഖപ്പെടുത്തി. വസ്തുതാവിരുദ്ധമായ കാര്യങ്ങൾ പ്രചരിപ്പിക്കുന്നതിൽ നിന്ന് ആളുകൾ പിന്തിരിയണമെന്ന് ആരാധകരും ആവശ്യപ്പെടുന്നുണ്ട്.
അതേസമയം, വിവാദങ്ങൾക്കിടയിലും കരിയറിൽ കൈനിറയെ സിനിമകളുമായി തിരക്കിലാണ് ധനുഷ്. അദ്ദേഹത്തിന്റേതായി അണിയറയിൽ ഒരുങ്ങുന്ന വമ്പൻ ചിത്രങ്ങളിൽ ഒന്നാണ് ‘ഓം – ചാപ്റ്റർ 1’. മമ്മൂട്ടി, സായ് പല്ലവി, ശ്രീലീല, നസീറുദ്ദീൻ ഷാ തുടങ്ങിയ വൻ താരനിര അണിനിരക്കുന്ന ചിത്രം ദീപാവലി റിലീസിൽ നിന്നും മാറ്റി വെച്ചിരുന്നു. ചിത്രം നവംബർ 20-ന് തിയറ്ററുകളിൽ എത്തും.