മുംബൈയിൽ നിന്ന് ജൽനയിലേക്ക് പോവുകയായിരുന്ന ഒരു സ്വകാര്യ ആഡംബര ബസിന് ഓടിക്കൊണ്ടിരിക്കെ തീപിടിച്ചു. ഇന്ന് പുലർച്ചെ നാഗ്‌പൂർ ലെയിനിന് സമീപമാണ് അപകടം നടന്നത്. ബസിൽ 12 യാത്രക്കാരാണ് ഉണ്ടായിരുന്നത്. തീ പടർന്ന ഉടൻ തന്നെ ഡ്രൈവർ ഹുസൈൻ സയ്യിദ് ബസ് നിർത്തി, ജീവനക്കാരുടെ സഹായത്തോടെ യാത്രക്കാർ എല്ലാവരും സുരക്ഷിതരായി പുറത്തിറങ്ങി. എന്നാൽ അധികം വൈകാതെ ബസ് പൂർണമായും കത്തിനശിച്ചു. ഹൈവേ പോലീസും ടോൾ പ്ലാസ അധികൃതരും ഉടൻ സ്ഥലത്തെത്തി തീയണച്ചു. അപകടത്തിൽ ആർക്കും പരിക്കില്ല.
അതേസമയം സമൃദ്ധി ഹൈവേയിൽ ബസിന് തീപിടിക്കാനുണ്ടായ കാരണം വ്യക്തമല്ല. എന്നാൽ, കഴിഞ്ഞ ഒരാഴ്ചക്കിടെ ഇത്തരം സംഭവങ്ങൾ പലതവണ ആവർത്തിക്കുന്നത് ആശങ്കയുളവാക്കുന്നുണ്ട്. അടുത്തിടെ ആന്ധ്രയിലെ കുർണൂലിൽ നടന്ന അപകടത്തിൽ 20 പേർ മരണപ്പെട്ടിരുന്നു. തൊട്ടുപിന്നാലെ 70 യാത്രക്കാരുമായി ഡൽഹിയിൽ നിന്ന് പുറപ്പെട്ട ഡബിൾ ഡെക്കർ സ്ലീപ്പർ ബസിന് ആഗ്ര – ലഖ്‌നൗ ദേശീയപാതയിൽ വെച്ച് തീപിടിച്ചപ്പോഴും ജീവനക്കാരുടെ സമയോചിതമായ ഇടപെടൽ കാരണം യാത്രക്കാർ രക്ഷപ്പെട്ടിരുന്നു.