മുംബൈ: വെള്ളിത്തിരയിലെ പ്രകടനങ്ങൾ കൊണ്ട് വിസ്മയിപ്പിക്കുന്ന ബോളിവുഡ് താരങ്ങൾ ഇപ്പോൾ റിയൽ എസ്റ്റേറ്റ് വിപണിയിലും തങ്ങളുടെ കരുത്ത് തെളിയിക്കുകയാണ്. നിക്ഷേപ ബുദ്ധിയിൽ സൂപ്പർ സ്റ്റാറുകളെപ്പോലും പിന്നിലാക്കുന്ന പ്രകടനവുമായി രംഗത്തെത്തിയിരിക്കുകയാണ് നടി മാധുരി ദീക്ഷിത്. മുംബൈയിലെ ജുഹുവിലുള്ള തന്റെ അപ്പാർട്ട്മെന്റ് വിൽപനയിലൂടെ ഏകദേശം നൂറ് ശതമാനം ലാഭമാണ് താരം കൊയ്തത്.
2012-ൽ താരം നിക്ഷേപമായി വാങ്ങിയ അപ്പാർട്ട്മെന്റാണ് ഇപ്പോൾ വൻ വിലയ്ക്ക് വിറ്റഴിച്ചിരിക്കുന്നത്. ജുഹു മിലിട്ടറി റോഡിലെ ‘ദീപ് വർഷ’ സൊസൈറ്റിയിലുള്ള 780 ചതുരശ്ര അടി വിസ്തീർണ്ണമുള്ള ഫ്ലാറ്റിന് അന്ന് 1.95 കോടി രൂപയായിരുന്നു വില. എന്നാൽ നിലവിലെ വിപണി മൂല്യമനുസരിച്ച് 3.9 കോടി രൂപയ്ക്കാണ് താരം ഈ ഫ്ലാറ്റ് കൈമാറിയത്. അതായത് വെറും പന്ത്രണ്ട് വർഷം കൊണ്ട് തന്റെ നിക്ഷേപത്തിന്മേൽ 99.2 ശതമാനം ലാഭം നേടാൻ മാധുരിക്ക് സാധിച്ചു.
വീട് വിൽപനയ്ക്ക് പുറമെ, ഒരു പാർക്കിങ് സ്ലോട്ട് വിറ്റതിലൂടെ മാധുരി നേടിയ തുകയാണ് ഇപ്പോൾ ആരാധകരെ ഞെട്ടിച്ചിരിക്കുന്നത്. മുംബൈ പോലൊരു നഗരത്തിൽ പാർക്കിങ് സൗകര്യത്തിനുള്ള വില എത്രത്തോളമാണെന്ന് അടിവരയിടുന്നതായിരുന്നു ഈ വിൽപന. അതേ സൊസൈറ്റിയിലെ ഒരു പാർക്കിങ് സ്ലോട്ട് 15 ലക്ഷം രൂപയ്ക്കാണ് താരം വിറ്റത്.
കേവലം പ്രോപ്പർട്ടി വിൽപനയിൽ മാത്രം ഒതുങ്ങുന്നതല്ല മാധുരിയുടെ റിയൽ എസ്റ്റേറ്റ് ബിസിനസ്. അന്ധേരി വെസ്റ്റിലുള്ള തന്റെ പ്രോപ്പർട്ടി ഒരു സ്വകാര്യ കമ്പനിക്ക് വാടകയ്ക്ക് നൽകിയതിലൂടെ മാസം തോറും 3 ലക്ഷം രൂപ താരം വരുമാനമായി നേടുന്നുണ്ട്. കൂടാതെ, 2022-ൽ ലോവർ പരേലിൽ 48 കോടി രൂപ മുടക്കി താരം വാങ്ങിയ ആഡംബര അപ്പാർട്ട്മെന്റും വരും വർഷങ്ങളിൽ വലിയ ലാഭം നൽകുന്ന നിക്ഷേപമായിട്ടാണ് വിപണി വിലയിരുത്തുന്നത്.