കൽപറ്റ: നെടുമ്പാശ്ശേരിയിൽ മദ്യലഹരിയിൽ 19കാരൻ ഓടിച്ച ആഡംബര കാർ ഇടിച്ച് മൂന്ന് പേർ മരിച്ച സംഭവത്തിൽ പ്രതി സുഹൈൽ സജീവിനെതിരെ കൊലക്കുറ്റം ചുമത്തണമെന്ന് ആവശ്യപ്പെട്ട് ദേവികയുടെ കുടുംബം. പ്രതിയെ കുട്ടികളെ പാർപ്പിക്കുന്ന കേന്ദ്രത്തിലേക്ക് റിമാൻഡ് ചെയ്തെന്ന വിവരം അറിഞ്ഞതിൽ കുടുംബം പ്രതിഷേധം അറിയിച്ചു. 19 വയസ്സുള്ള ഒരാളെ എങ്ങനെ കുട്ടിയായി കാണാനാകുമെന്ന് ദേവികയുടെ പിതാവ് സന്തോഷ് ചോദിച്ചു. പ്രതിയായ മകനെ രക്ഷിക്കാൻ പിതാവ് ഇടപെടൽ നടത്തുന്നതായാണ് തങ്ങൾക്ക് തോന്നുന്നതെന്നും അദ്ദേഹം ആരോപിച്ചു.
സുഹൈൽ മദ്യത്തിന് പുറമേ മറ്റ് ലഹരിവസ്തുക്കളും ഉപയോഗിച്ചിരുന്നോ എന്ന സംശയവും കുടുംബം ഉന്നയിച്ചു. മൂന്ന് ബാറുകളിൽ കയറി മദ്യപിച്ച ശേഷമാണ് സുഹൈൽ വാഹനമോടിച്ചതെന്ന് മാധ്യമങ്ങളിലൂടെ അറിഞ്ഞതായും നാട്ടുകാർ കാർ അമിതവേഗത്തിലായിരുന്നുവെന്ന് പറഞ്ഞതായും സന്തോഷ് വ്യക്തമാക്കി. നിലവിൽ മനഃപൂർവമല്ലാത്ത നരഹത്യയ്ക്കാണ് കേസെടുത്തിരിക്കുന്നതെന്നും അതിന് പകരം കൊലക്കുറ്റം ചുമത്തണമെന്നുമാണ് കുടുംബത്തിന്റെ ആവശ്യം. “എല്ലാം വാപ്പച്ചി നോക്കിക്കൊള്ളും” എന്ന പ്രതിയുടെ വാക്കുകളിൽ പണത്തിന്റെ ഹുങ്കും ധിക്കാരവുമാണ് പ്രകടമായതെന്നും സന്തോഷ് ആരോപിച്ചു.
സാമ്പത്തികമായി പിന്നാക്കം നിൽക്കുന്ന കുടുംബമാണ് തങ്ങളുടേതെന്നും സ്ഥലം വിറ്റും വായ്പയെടുത്തുമാണ് ദേവികയെ പഠിപ്പിച്ചതെന്നും പിതാവ് പറഞ്ഞു. ബി.ബി.എയും ഏവിയേഷൻ കോഴ്‌സും മികച്ച നിലയിൽ പൂർത്തിയാക്കിയ ദേവിക നല്ല ജോലിക്കായി ശ്രമിക്കുകയായിരുന്നു. മൂന്നുനാലു മാസത്തിനകം ഗൾഫിലേക്ക് പോകാനാകുമെന്ന പ്രതീക്ഷയിലായിരുന്നു കുടുംബം. മകളുടെ മരണത്തോടെ കുടുംബത്തിന്റെ പ്രതീക്ഷകളാണ് തകർന്നതെന്നും ഇനി മറ്റൊരു കുടുംബത്തിനും ഈ അവസ്ഥ ഉണ്ടാകരുതെന്നും സന്തോഷ് പറഞ്ഞു. അപകടത്തിൽപ്പെട്ട ആഡംബര കാർ സുഹൈലിന് അമ്മ പിറന്നാൾ സമ്മാനമായി നൽകിയതാണെന്ന് അറിഞ്ഞതായും അദ്ദേഹം കൂട്ടിച്ചേർത്തു. ഇതുവരെ പോലീസിന്റെ ഭാഗത്തുനിന്ന് നല്ല സമീപനമാണ് ഉണ്ടായതെന്നും നീതിക്കൊപ്പം സർക്കാർ നിൽക്കുമെന്നാണ് പ്രതീക്ഷയെന്നും അദ്ദേഹം വ്യക്തമാക്കി.
ദേവികയുടെ അമ്മയുടെ സഹോദരൻ സന്ദീപും പ്രതിക്കെതിരെ കൂടുതൽ വകുപ്പുകൾ ചുമത്തണമെന്നും പരമാവധി ശിക്ഷ ഉറപ്പാക്കണമെന്നും ആവശ്യപ്പെട്ടു. കേസിന്റെ ഏതറ്റം വരെയും പോകുമെന്നും അദ്ദേഹം പറഞ്ഞു. കുടുംബത്തിന്റെ പ്രതീക്ഷ മുഴുവൻ ദേവികയിലായിരുന്നുവെന്നും ഇളയ സഹോദരൻ ദേവാനന്ദിന് പ്രായം കുറവാണെന്നും സന്ദീപ് ചൂണ്ടിക്കാട്ടി. ഞായറാഴ്ച രാത്രി പത്തരയോടെ തെക്കുംതറയിലെ തറവാടായ പുതിയപുരയിലാണ് ദേവികയുടെ സംസ്കാരം നടന്നത്. അപകടവിവരം അറിഞ്ഞ് നിരവധി പേർ വീട്ടിലെത്തി. മൂന്ന് വർഷം മുമ്പ് കുടുംബം കൽപറ്റ മടക്കിമലയിലേക്ക് താമസം മാറിയിരുന്നെങ്കിലും സംസ്കാരച്ചടങ്ങുകൾ അമ്മ സരിതയുടെ തെക്കുംതറയിലെ തറവാട്ടുവീട്ടിലാണ് നടത്തിയത്. പ്രതിക്കെതിരായ നിയമനടപടികളിൽ നീതി ലഭിക്കുമെന്ന പ്രതീക്ഷയിലാണ് ദേവികയുടെ കുടുംബം.