നേപ്പാളിലെ ധാഡിങ് ജില്ലയിലുണ്ടായ ദാരുണമായ ബസ് അപകടത്തിൽ 18 പേർ കൊല്ലപ്പെട്ടു. പൊഖാറയിൽ നിന്ന് കാഠ്മണ്ഡുവിലേക്ക് വരികയായിരുന്ന ബസ് നിയന്ത്രണം വിട്ട് ത്രിശൂലി നദിയിലേക്ക് മറിയുകയായിരുന്നു. മരിച്ചവരിൽ ആറ് സ്ത്രീകളും പന്ത്രണ്ട് പുരുഷന്മാരും ഉൾപ്പെടുന്നു. ഇതിൽ ഒരാൾ ന്യൂസിലൻഡ് സ്വദേശിയാണ്. ഇന്ന് പുലർച്ചെ നടന്ന അപകടത്തിൽ ബസ് പൂർണ്ണമായും തകർന്നു. ബസിന്റെ നിയന്ത്രണം നഷ്ടപ്പെട്ടതാണ് അപകടത്തിന് കാരണമായതെന്നാണ് പ്രാഥമിക നിഗമനം.
അപകടത്തിൽ പരിക്കേറ്റ 27 യാത്രക്കാരെ ഉടനടി വിവിധ ആശുപത്രികളിൽ പ്രവേശിപ്പിച്ചു. സംഭവസ്ഥലത്ത് അധികൃതരുടെ നേതൃത്വത്തിൽ രക്ഷാപ്രവർത്തനം ഊർജിതമായി തുടരുകയാണ്. നേപ്പാൾ അധികൃതർ മരണം സ്ഥിരീകരിക്കുകയും പരിക്കേറ്റവർക്ക് ആവശ്യമായ ചികിത്സാ സൗകര്യങ്ങൾ ഉറപ്പാക്കുകയും ചെയ്തിട്ടുണ്ട്.