ഐഫോൺ 18 പ്രോ സീരീസിലെ പുതിയ മാറ്റങ്ങളെക്കുറിച്ചും സവിശേഷതകളെക്കുറിച്ചും ടെക് ലോകത്ത് വലിയ ചർച്ചകളാണ് നടക്കുന്നത്. ഇത്തവണത്തെ ലോഞ്ച് തന്ത്രത്തിൽ ആപ്പിൾ വലിയ മാറ്റങ്ങളാണ് വരുത്തുന്നത്. ഈ വർഷം ഐഫോൺ 18 പ്രോ, ഐഫോൺ 18 പ്രോ മാക്സ് എന്നീ മോഡലുകൾ മാത്രമായിരിക്കും പുറത്തിറങ്ങുക. സാധാരണ ഐഫോൺ 18 മോഡലിന്റെ ലോഞ്ച് 2027-ലേക്ക് മാറ്റാനാണ് കമ്പനിയുടെ തീരുമാനം.
ഫോണിന്റെ രൂപകല്പനയിൽ വലിയ മാറ്റങ്ങളൊന്നും ആപ്പിൾ വരുത്തുന്നില്ല. കഴിഞ്ഞ മോഡലുകളിലെ അതേ ക്യാമറ പ്ലാറ്റോ ശൈലി തന്നെയായിരിക്കും തുടരുക. എങ്കിലും പുതിയ നിറങ്ങളുടെ പരീക്ഷണം ആപ്പിൾ നടത്തുന്നുണ്ട്. ഡാർക്ക് ചെറി, ലൈറ്റ് ബ്ലൂ, സിൽവർ, ഡാർക്ക് ഗ്രേ എന്നീ നിറങ്ങളിൽ ഫോൺ ലഭ്യമാകും. ഇതിൽ ഡാർക്ക് ചെറി കളറായിരിക്കും ഏറ്റവും വലിയ ആകർഷണം.
ഡിസ്പ്ലേയുടെ കാര്യത്തിൽ ശ്രദ്ധേയമായ ചില പരിഷ്കാരങ്ങൾ പ്രതീക്ഷിക്കാം. നിലവിലുള്ള ഡൈനാമിക് ഐലൻഡിന്റെ വലിപ്പം 35 ശതമാനത്തോളം കുറയ്ക്കാൻ ആപ്പിൾ ഒരുങ്ങുന്നു. ഇത് സ്ക്രീനിൽ ഉപയോക്താക്കൾക്ക് കൂടുതൽ വ്യക്തതയും സ്ഥലവും നൽകും. ഐഫോൺ 18 പ്രോ 6.3 ഇഞ്ച് ഡിസ്പ്ലേയിലും പ്രോ മാക്സ് 6.9 ഇഞ്ച് ഡിസ്പ്ലേയിലുമായിരിക്കും എത്തുക. ഒപ്പം പുതിയ LTPO+ പാനലുകളും ഇവയിൽ ഉൾപ്പെടുത്തുന്നുണ്ട്.
ഫോണിന്റെ കരുത്ത് വർധിപ്പിക്കാനായി ടിഎസ്എംസിയുടെ 2nm സാങ്കേതികവിദ്യയിൽ നിർമ്മിച്ച എ20 പ്രോ ചിപ്പായിരിക്കും ഉപയോഗിക്കുക. ഇത് ഫോണിന്റെ വേഗത 15 ശതമാനവും പവർ കാര്യക്ഷമത 30 ശതമാനവും വർധിപ്പിക്കും. ബാറ്ററി ശേഷിയിലും ചെറിയ വർധനവുണ്ടാകും. 48 മെഗാപിക്സലിന്റെ മൂന്ന് ക്യാമറകളുള്ള ട്രിപ്പിൾ ക്യാമറ സിസ്റ്റം തന്നെയാണ് ഇത്തവണയും ആപ്പിൾ ഉപയോഗിക്കുന്നത്. ഇതിൽ വേരിയബിൾ അപേർച്ചർ സംവിധാനവും സാംസങ് വികസിപ്പിച്ച പുതിയ ഇമേജ് സെൻസറും ഉൾപ്പെടുത്താൻ സാധ്യതയുണ്ട്.