മുംബൈ: മരിച്ച അച്ഛൻ ഒരിക്കൽ കൂടി ജീവിതത്തിലേക്ക് തിരിച്ചെത്തുമെന്ന പ്രതീക്ഷയിൽ മൃതദേഹം സംസ്കരിക്കാതെ വർഷങ്ങളോളം സൂക്ഷിച്ച സംഭവമാണ് മുംബൈ മലാഡിൽ പുറത്തുവന്നത്. 2022 ജൂണിൽ മരിച്ച 78കാരന്റെ മൃതദേഹം മലാഡ് ഈസ്റ്റിലെ അടച്ചിട്ട ഡേ കെയർ സെന്ററിലെ ഫ്രീസറിൽ ഏകദേശം നാല് വർഷമാണ് സൂക്ഷിച്ചിരുന്നത്. പൂട്ടിയിട്ട കേന്ദ്രത്തിൽ നിന്ന് ശക്തമായ ദുർഗന്ധം ഉയർന്നതോടെ പ്രദേശവാസികൾ പൊലീസിൽ പരാതി നൽകിയതോടെയാണ് സംഭവം പുറത്തറിഞ്ഞത്.
അച്ഛനുമായി ഏറെ അടുപ്പമുണ്ടായിരുന്ന മകൾ മൃതദേഹം സംരക്ഷിച്ച് ഭാവിയിൽ പുനർജീവിപ്പിക്കാമെന്ന പ്രതീക്ഷയിലായിരുന്നുവെന്നാണ് പൊലീസ് വൃത്തങ്ങളെ ഉദ്ധരിച്ചുള്ള റിപ്പോർട്ടുകൾ. അമേരിക്കയിൽ താമസിക്കുന്ന മകൾ സഹോദരനൊപ്പം മൃതദേഹം സംരക്ഷിക്കാൻ തീരുമാനിച്ചതായും ഇതിനായി പ്രതിമാസം ഏകദേശം 1.6 ലക്ഷം രൂപ ചെലവഴിച്ചിരുന്നതായും റിപ്പോർട്ടുകളുണ്ട്. വിദേശത്തുള്ള മൃതദേഹം സംരക്ഷിക്കുന്ന സ്ഥാപനവുമായി ബന്ധപ്പെട്ട് മൃതദേഹം പിന്നീട് അമേരിക്കയിലേക്ക് മാറ്റാനും ശ്രമിച്ചിരുന്നതായി റിപ്പോർട്ടുകൾ പറയുന്നു.
മരിച്ചയാളുടെ മരണകാരണം സംബന്ധിച്ച് റിപ്പോർട്ടുകളിൽ ചെറിയ വ്യത്യാസമുണ്ട്. ചില റിപ്പോർട്ടുകൾ 2022 ജൂണിലെ ഹൃദയാഘാതമാണ് മരണകാരണമെന്ന് വ്യക്തമാക്കുമ്പോൾ, പൊലീസ് വൃത്തങ്ങളെ ഉദ്ധരിച്ചുള്ള മറ്റൊരു റിപ്പോർട്ടിൽ കാൻസറിന് പിന്നാലെ ഹൃദയാഘാതമുണ്ടായെന്നാണ് പറയുന്നത്. മരണത്തിൽ അസ്വാഭാവികത കണ്ടെത്തിയിട്ടില്ലെന്നും ദീർഘകാലം മൃതദേഹം സൂക്ഷിച്ചിരുന്നത് അസാധാരണമായ കാര്യമാണെന്നും പൊലീസ് വ്യക്തമാക്കിയതായി റിപ്പോർട്ടുണ്ട്. കുടുംബം മരണ സർട്ടിഫിക്കറ്റും ബി.എം.സി.ക്ക് നൽകിയ രേഖകളും പൊലീസിന് കൈമാറിയിട്ടുണ്ട്.
സംഭവത്തിൽ മൃതദേഹം എങ്ങനെ ഇത്രയും കാലം സൂക്ഷിച്ചുവെന്നും ഡേ കെയർ സെന്റർ അധികൃതർക്ക് ഇതേക്കുറിച്ച് അറിവുണ്ടായിരുന്നോ എന്നും പൊലീസ് അന്വേഷിക്കുകയാണ്. മൃതദേഹത്തിന്റെ നിലവിലെ അവസ്ഥ പരിശോധിക്കാൻ മുംബൈയിലെ കൂപ്പർ ആശുപത്രിയിലെ വിദഗ്ധരുമായി പൊലീസ് ആശയവിനിമയം നടത്തുന്നുണ്ട്. മൃതദേഹം ദീർഘകാലം സൂക്ഷിക്കുന്ന രീതിയായ ക്രയോണിക്സ് ഇന്ത്യയിൽ നിയമപരമായോ ശാസ്ത്രീയമായി അംഗീകരിക്കപ്പെട്ട ചികിത്സാ രീതിയായോ നിലവിലില്ലെന്നും റിപ്പോർട്ടുകൾ ചൂണ്ടിക്കാട്ടുന്നു. സംഭവത്തിൽ നിയമപരമായ തുടർനടപടികൾ പരിശോധിച്ചുവരികയാണ്.