പശ്ചിമ ബംഗാൾ നിയമസഭാ തിരഞ്ഞെടുപ്പിന് മുന്നോടിയായി കേന്ദ്ര തിരഞ്ഞെടുപ്പ് കമ്മീഷനും തൃണമൂൽ കോൺഗ്രസും തമ്മിലുള്ള ഭിന്നത രൂക്ഷമാകുന്നു. ചീഫ് ഇലക്ഷൻ കമ്മീഷണർ ഗ്യാനേഷ് കുമാർ തങ്ങളുടെ പ്രതിനിധി സംഘത്തെ അധിക്ഷേപിക്കുകയും ഓഫീസിൽ നിന്ന് ഇറക്കിവിടുകയും ചെയ്തതായി തൃണമൂൽ കോൺഗ്രസ് നേതാവ് ഡെറിക് ഒബ്രിയാൻ ആരോപിച്ചു. കൂടിക്കാഴ്ച ആരംഭിച്ച് മിനിറ്റുകൾക്കുള്ളിൽ കമ്മീഷണർ തങ്ങളോട് ‘ഗെറ്റ് ലോസ്റ്റ്’ എന്ന് ആക്രോശിച്ചതായാണ് തൃണമൂൽ പക്ഷം പറയുന്നത്.
ബംഗാൾ മുഖ്യമന്ത്രി മമത ബാനർജി നൽകിയ ഒമ്പത് കത്തുകളുമായിട്ടാണ് തൃണമൂൽ സംഘം കമ്മീഷണറെ കാണാനെത്തിയത്. ഉദ്യോഗസ്ഥരുടെ പുനഃസംഘടനയെക്കുറിച്ചും മാതൃകാ പെരുമാറ്റച്ചട്ടം നിലവിൽ വന്നതിനുശേഷം പോലീസ് ഉദ്യോഗസ്ഥരെ മാറ്റിയതിനെക്കുറിച്ചും സംഘം ചോദ്യങ്ങൾ ഉന്നയിച്ചിരുന്നു. ഇതിൽ പ്രകോപിതനായാണ് കമ്മീഷണർ മോശമായി പെരുമാറിയതെന്ന് ഡെറിക് ഒബ്രിയാൻ വിശദീകരിച്ചു. രാജ്യസഭയിലും ലോക്സഭയിലും സ്ഥാനത്തുനിന്ന് നീക്കാൻ നോട്ടീസ് ലഭിച്ച ഏക കമ്മീഷണറായതിന് ഗ്യാനേഷ് കുമാറിനെ തൃണമൂൽ അംഗങ്ങൾ പരിഹസിച്ചതും തർക്കം മുറുകാൻ കാരണമായി.
അതേസമയം, തൃണമൂൽ നേതാക്കളുടെ ആരോപണങ്ങൾ തിരഞ്ഞെടുപ്പ് കമ്മീഷൻ വൃത്തങ്ങൾ പൂർണ്ണമായും തള്ളി. ഡെറിക് ഒബ്രിയാൻ കമ്മീഷണറെ ശാസിക്കുകയും സംസാരിക്കാൻ അനുവദിക്കാതെ ബഹളം വെക്കുകയുമാണ് ചെയ്തതെന്ന് കമ്മീഷൻ ഉദ്യോഗസ്ഥർ പ്രതികരിച്ചു. കമ്മീഷൻ മുറിയുടെ മാന്യത പാലിക്കണമെന്നും അലറി സംസാരിക്കരുതെന്നും മാത്രമാണ് കമ്മീഷണർ ആവശ്യപ്പെട്ടതെന്നും അവർ വ്യക്തമാക്കി.
സംഭവത്തിന് പിന്നാലെ, ബംഗാളിലെ തിരഞ്ഞെടുപ്പ് നിഷ്പക്ഷവും ഭയരഹിതവുമായിരിക്കുമെന്ന് കമ്മീഷൻ എക്സിലൂടെ അറിയിച്ചെങ്കിലും ഇത് കള്ളമാണെന്ന് തൃണമൂൽ എം.പിമാരായ സാഗരിക ഘോഷും സാകേത് ഗോഖലെയും ആരോപിച്ചു. കൂടിക്കാഴ്ചയുടെ സിസിടിവി ദൃശ്യങ്ങളോ ഓഡിയോയോ പുറത്തുവിടാൻ തൃണമൂൽ കമ്മീഷനെ വെല്ലുവിളിച്ചിട്ടുണ്ട്. ഏപ്രിൽ 23, 29 തീയതികളിൽ വോട്ടെടുപ്പ് നടക്കാനിരിക്കെ പുറത്തുവന്ന ഈ വിവാദം വലിയ രാഷ്ട്രീയ ചർച്ചകൾക്ക് വഴിവെച്ചിരിക്കുകയാണ്.