നിവിൻ പോളിയുടെ ഗംഭീര തിരിച്ചുവരവിന് സാക്ഷ്യം വഹിച്ച ‘സർവ്വം മായ’ സമീപകാല മലയാള സിനിമയിൽ ഏറ്റവുമധികം പോസിറ്റീവ് മൗത്ത് പബ്ലിസിറ്റി നേടിയ ചിത്രങ്ങളിലൊന്നായി മാറിക്കഴിഞ്ഞു. അഖിൽ സത്യൻ സംവിധാനം ചെയ്ത ഈ ചിത്രം ഹൊറർ-കോമഡി വിഭാഗത്തിലാണ് ഉൾപ്പെടുന്നതെങ്കിലും, കോമഡിക്കും കുടുംബബന്ധങ്ങൾക്കും നൽകിയിരിക്കുന്ന പ്രാധാന്യമാണ് പ്രേക്ഷകരെ ആകർഷിക്കുന്നത്. ക്രിസ്മസ് റിലീസായി ഡിസംബർ 25-ന് തിയറ്ററുകളിലെത്തിയ ചിത്രം, ഒരു ഇടവേളയ്ക്ക് ശേഷം നിവിൻ പോളിക്ക് വലിയൊരു ബോക്സ് ഓഫീസ് വിജയം സമ്മാനിച്ചുകൊണ്ട് പ്രദർശനം തുടരുകയാണ്.
അതേസമയം റിലീസ് ദിനം മുതൽ മികച്ച അഭിപ്രായങ്ങൾ നേടിയ അഖിൽ സത്യൻ ചിത്രം ‘സർവ്വം മായ’ ബോക്സ് ഓഫീസിൽ പുതുചരിത്രം കുറിക്കുകയാണ്. നിവിൻ പോളിയുടെ കരിയറിലെ ആദ്യ 100 കോടി ചിത്രമായി മാറിയ ഈ ചിത്രം, റിലീസ് ചെയ്ത് 19 ദിവസങ്ങൾ പിന്നിടുമ്പോൾ മലയാള സിനിമയിലെ എക്കാലത്തെയും വലിയ 10 വിജയങ്ങളുടെ പട്ടികയിൽ ഇടംപിടിച്ചു. ആഗോള ബോക്സ് ഓഫീസിൽ നിന്ന് ചിത്രം 125 കോടി പിന്നിട്ടതായി നിർമ്മാതാക്കൾ നേരത്തെ അറിയിച്ചിരുന്നു. പ്രമുഖ ബോക്സ് ഓഫീസ് ട്രാക്കർമാരായ സാക്നിൽകിന്റെ കണക്കുകൾ പ്രകാരം 130.5 കോടി രൂപയാണ് ചിത്രം ഇതുവരെ നേടിയിരിക്കുന്നത്. ഈ വമ്പൻ നേട്ടത്തോടെ 2024-ലെ ക്രിസ്മസ് വിജയിയായി മാറിയിരിക്കുകയാണ് ഈ ഹൊറർ-കോമഡി ചിത്രം.
മോഹൻലാൽ ചിത്രം ‘ലൂസിഫറി’ന്റെ 129 കോടി എന്ന ആജീവനാന്ത കളക്ഷനെ മറികടന്നുകൊണ്ടാണ് ‘സർവ്വം മായ’ മലയാളത്തിലെ എക്കാലത്തെയും മികച്ച പത്ത് സിനിമകളുടെ പട്ടികയിൽ പത്താം സ്ഥാനത്തെത്തിയത്. റിലീസ് ചെയ്ത് മൂന്നാഴ്ച പിന്നിട്ടിട്ടും ബോക്സ് ഓഫീസിൽ ശക്തമായ മുന്നേറ്റം തുടരുന്ന ചിത്രം, കഴിഞ്ഞ തിങ്കളാഴ്ച മാത്രം ഇന്ത്യയിൽ നിന്ന് 1.1 കോടി രൂപയാണ് നേടിയത്. ഇതോടെ 136.25 കോടി രൂപയുമായി ഒൻപതാം സ്ഥാനത്തുള്ള ‘പ്രേമലു’വിന്റെ റെക്കോർഡിന് തൊട്ടടുത്തെത്താൻ നിവിൻ പോളി ചിത്രത്തിന് സാധിച്ചു. നിലവിലെ ആവേശകരമായ കുതിപ്പ് തുടരുകയാണെങ്കിൽ ചിത്രം വൈകാതെ തന്നെ പട്ടികയിൽ ഇനിയും മുന്നേറുമെന്നാണ് ബോക്സ് ഓഫീസ് ട്രാക്കർമാരുടെ വിലയിരുത്തൽ.