പ്രളയബാധിതരെ സഹായിക്കാനെത്തിയ സംഭാവന പോലും തട്ടിപ്പിന് ഉപയോഗിച്ച് നേപ്പാളിൽ യുവാവ് അറസ്റ്റിൽ. പ്രധാനമന്ത്രിയുടെ ദുരന്തനിവാരണ നിധിയിലേക്ക് 1.2 ലക്ഷം നേപ്പാൾ രൂപ സംഭാവന നൽകിയെന്ന വ്യാജരേഖ എഐ ഉപയോഗിച്ച് തയ്യാറാക്കി സമൂഹമാധ്യമങ്ങളിൽ പ്രചരിപ്പിച്ച 32കാരനെയാണ് രാമെഛാപ് ജില്ലാ പൊലീസ് അറസ്റ്റ് ചെയ്തത്. ഗോകുൽഗംഗ റൂറൽ മുനിസിപ്പാലിറ്റി സ്വദേശിയായ ഭഗവാൻ കർക്കിയാണ് അറസ്റ്റിലായത്.
പൊലീസിന്റെ അന്വേഷണത്തിൽ, കർക്കി ചാറ്റ്ജിപിടി ഉപയോഗിച്ചാണ് 1,20,000 നേപ്പാൾ രൂപ പ്രധാനമന്ത്രിയുടെ ദുരന്തനിവാരണ നിധിയിലേക്ക് നൽകിയതായി കാണിക്കുന്ന വ്യാജ ഇ-സേവ ഇടപാട് രേഖ തയ്യാറാക്കിയതെന്ന് കണ്ടെത്തി. പ്രധാനമന്ത്രിയുടെ ദുരന്തനിവാരണ നിധിയുടെ പേരും യഥാർഥ ഇടപാടിന് സമാനമായ രീതിയിലുള്ള വിവരങ്ങളും ഉൾപ്പെടുത്തിയ രേഖ സമൂഹമാധ്യമങ്ങളിൽ പങ്കുവെച്ച്, ഭോതേകോശി വെള്ളപ്പൊക്ക ദുരന്തബാധിതരെ സഹായിക്കാനായി സംഭാവന നൽകിയതായി ഇയാൾ അവകാശപ്പെട്ടു.
എന്നാൽ വ്യാജ സംഭാവനയുടെ തെളിവിനൊപ്പം നൽകിയ ക്യുആർ കോഡ് ഇയാളുടെ സ്വന്തം ഇ-സേവ, ബാങ്ക് അക്കൗണ്ടുകളുമായി ബന്ധിപ്പിച്ചതായിരുന്നു. ഇതുവഴി ദുരിതാശ്വാസത്തിന്റെ പേരിൽ പൊതുജനങ്ങളിൽ നിന്ന് ലഭിക്കുന്ന പണം സ്വന്തം അക്കൗണ്ടിലേക്ക് എത്തിക്കാനായിരുന്നു ശ്രമമെന്നാണ് പൊലീസ് പറയുന്നത്. രാമെഛാപ് ജില്ലാ പൊലീസ് ഇൻഫർമേഷൻ ഓഫീസർ ഇൻസ്പെക്ടർ കമൽ റൗട്ട് അറസ്റ്റും നിയമനടപടികളും സ്ഥിരീകരിച്ചു. തട്ടിപ്പ്, ഡിജിറ്റൽ രേഖകളുടെ ദുരുപയോഗം തുടങ്ങിയ നിയമപ്രകാരം നടപടികൾ പുരോഗമിക്കുകയാണ്.
നേപ്പാളിൽ പ്രളയവും മണ്ണിടിച്ചിലും വ്യാപക നാശനഷ്ടം ഉണ്ടാക്കിയ സാഹചര്യത്തിലാണ് ദുരിതാശ്വാസ പ്രവർത്തനങ്ങൾക്കായി വലിയ തോതിൽ സംഭാവനകൾ എത്തുന്നത്. ഇതിനിടയിലെ എഐ അധിഷ്ഠിത തട്ടിപ്പുകളും അനധികൃത ക്യുആർ കോഡുകളും കണക്കിലെടുത്ത്, സ്ഥിരീകരിച്ച ഔദ്യോഗിക മാർഗങ്ങളിലൂടെ മാത്രം സംഭാവന നൽകണമെന്ന് നേപ്പാൾ സർക്കാരും പൊലീസും മുന്നറിയിപ്പ് നൽകിയിട്ടുണ്ട്. പ്രധാനമന്ത്രിയുടെ ദുരന്തനിവാരണ നിധിയുടെ ഔദ്യോഗിക പോർട്ടലിലൂടെയോ അധികൃതർ വ്യക്തമാക്കിയ ബാങ്ക് അക്കൗണ്ടുകളിലൂടെയോ മാത്രം പണം നൽകണമെന്നാണ് നിർദേശം.