മണ്ഡലകാല തീർത്ഥാടനത്തിന്റെ ആദ്യ ദിവസങ്ങളിൽ അനുഭവപ്പെട്ട ശക്തമായ ഭക്തജനത്തിരക്ക് നിലവിൽ നിയന്ത്രണ വിധേയമായി. സന്നിധാനത്ത് ഇപ്പോൾ സാധാരണഗതിയിലുള്ള തിരക്ക് മാത്രമാണ് അനുഭവപ്പെടുന്നത്. സ്പോട്ട് ബുക്കിങ്ങിൽ നിയന്ത്രണം കൊണ്ടുവന്നതാണ് തിരക്ക് നിയന്ത്രിക്കാൻ പ്രധാനമായും സഹായിച്ചത്.
ഇതോടെ തീർത്ഥാടകർ സംതൃപ്തിയോടെയാണ് മലയിറങ്ങുന്നത്. മണ്ഡലകാല തീർത്ഥാടനത്തിന്റെ ആറാം ദിവസമായ ഇന്നലെ 86,747 ഓളം ഭക്തരാണ് ദർശനം നടത്തിയത്. 8,623 പേർ സ്പോട്ട് ബുക്കിംഗ് വഴിയും 1004 പേർ പുല്ലുമേട് വഴിയും സന്നിധാനത്ത് എത്തി. രാവിലെ നട തുറക്കുന്ന സമയത്താണ് ഏറ്റവുമധികം ഭക്തജനതിരക്ക് ഉണ്ടാകുന്നത്. കാനന പാത വഴിയും ആയിരക്കണക്കിന് ഭക്തർ ദർശനത്തിനായി എത്തുന്നുണ്ട്.
ശബരിമലയിലെ തിരക്ക് നിയന്ത്രണവുമായി ബന്ധപ്പെട്ട് കൂടുതൽ കാര്യങ്ങൾ ചർച്ച ചെയ്യുന്നതിനായി ഇന്ന് പമ്പയിൽ ദേവസ്വം മന്ത്രി വി.എൻ. വാസവന്റെ അധ്യക്ഷതയിൽ പ്രത്യേക യോഗം ചേരും. അതേസമയം, ശബരിമല സ്വർണക്കൊള്ളക്കേസിൽ തുടർ അറസ്റ്റിലേക്ക് ഉടൻ കടക്കാൻ ഒരുങ്ങുകയാണ് പ്രത്യേക അന്വേഷണ സംഘം (എസ്.ഐ.ടി). കേസിൽ തിരുവിതാംകൂർ ദേവസ്വം ബോർഡ് മുൻ അംഗങ്ങളായ കെ.പി. ശങ്കരദാസും എൻ. വിജയകുമാറും നിരീക്ഷണത്തിലാണ്.