സുന്ദർ സി. സംവിധാനം ചെയ്യുന്ന ഹിറ്റ് ചിത്രം ‘മൂക്കുത്തി അമ്മൻ’ രണ്ടാം ഭാഗം ‘മഹാശക്തി’ നവംബർ 6ന് തിയറ്ററുകളിൽ എത്തും. ദീപാവലി റിലീസായാണ് ചിത്രം പ്രേക്ഷകർക്ക് മുന്നിലെത്തുന്നത്. ചിത്രത്തിന്റേതായി നേരത്തെ പുറത്തിറങ്ങിയ ടീസർ സമൂഹമാധ്യമങ്ങളിൽ വലിയ തരംഗം സൃഷ്ടിച്ചിരുന്നു.
യൂട്യൂബിൽ ഏഴ് ദശലക്ഷത്തിലധികം കാഴ്ചക്കാരെ നേടിയ ടീസർ, നിലവിൽ തിയറ്ററുകളിൽ പ്രദർശനം തുടരുന്ന ‘ജയിലർ 2’വിനൊപ്പം പ്രദർശിപ്പിക്കുന്നുണ്ട്. ലോകമെമ്പാടുമുള്ള പ്രേക്ഷകരെ ആകർഷിച്ച ആദ്യഭാഗത്തിന് ശേഷം ഭക്തി, നർമ്മം, സാമൂഹിക പ്രസക്തി എന്നിവ പൂർണ്ണമായും സംയോജിപ്പിച്ചാണ് ‘മഹാശക്തി’യുടെ രണ്ടാം ഭാഗം ഒരുക്കിയിരിക്കുന്നത്.
നയൻതാര പ്രധാന കഥാപാത്രത്തെ അവതരിപ്പിക്കുന്ന ചിത്രത്തിൽ ദുനിയ വിജയ്, റെജീന കാസാൻഡ്ര, ഉർവശി, യോഗി ബാബു, മൈന നന്ദിനി, ഗരുഡ റാം, അഭിനയ, സുനിൽ വർമ്മ ഇൻഡുകുരി, നിതിൻ സത്യ തുടങ്ങി വലിയൊരു താരനിര തന്നെയുണ്ട്.