2023-ലെ ഐപിഎൽ ചാമ്പ്യന്മാരായ ചെന്നൈ സൂപ്പർ കിങ്സിന് ഇത്തവണ കനത്ത തിരിച്ചടി. കഴിഞ്ഞ സീസണിന് ശേഷം പ്ലേഓഫ് കാണാൻ സാധിക്കാത്ത അവസ്ഥയിലാണ് ടീം. അവസാന ലീഗ് മത്സരത്തിൽ ഗുജറാത്ത് ടൈറ്റൻസിനോട് 89 റൺസിന് ദയനീയമായി പരാജയപ്പെട്ടതോടെ ടീമിന്റെ പ്ലേഓഫ് പ്രതീക്ഷകൾ പൂർണ്ണമായും അസ്തമിച്ചു. ഈ മോശം പ്രകടനത്തിന്റെ പശ്ചാത്തലത്തിൽ, വരാനിരിക്കുന്ന സീസണിന് മുന്നോടിയായി ടീമിൽ വലിയ മാറ്റങ്ങൾക്കും അഴിച്ചുപണികൾക്കും മാനേജ്മെന്റ് തയ്യാറെടുക്കുകയാണ്. മിനി താരലേലത്തിന് മുൻപായി ടീമിലെ പല പ്രമുഖ താരങ്ങളെയും റിലീസ് ചെയ്യാനാണ് സാധ്യത.
റിലീസ് ലിസ്റ്റിൽ ഏറ്റവും പ്രധാനപ്പെട്ട പേര് മുൻ നായകൻ എം.എസ്. ധോണിയുടേതാണ്. ഫിറ്റ്നസ് പ്രശ്നങ്ങൾ കാരണം ഇത്തവണ ഒരു മത്സരത്തിൽ പോലും കളിക്കാൻ അദ്ദേഹത്തിനായില്ല. 44 വയസ്സുള്ള ധോണിക്ക് കളിക്കാരനെന്ന നിലയിൽ ഇനിയൊരു തിരിച്ചുവരവ് അസാധ്യമാണെന്നാണ് വിലയിരുത്തൽ. ധോണിക്ക് പുറമെ കഴിഞ്ഞ മിനി ലേലത്തിൽ 14.20 കോടി രൂപയ്ക്ക് വാങ്ങിയ സ്പിൻ ഓൾറൗണ്ടർ പ്രശാന്ത് വീറും ടീമിൽ നിന്ന് പുറത്തായേക്കും. കളിച്ച ആറ് മത്സരങ്ങളിൽ നിന്ന് വെറും 90 റൺസ് മാത്രമാണ് അദ്ദേഹത്തിന് നേടാനായത്.
ബൗളിംഗ് നിരയിലാണ് ചെന്നൈയിൽ ഏറ്റവും വലിയ അഴിച്ചുപണി നടക്കാൻ പോകുന്നത്. രാഹുൽ ചാഹർ, കിവി പേസർ മാറ്റ് ഹെൻട്രി, ഓസ്ട്രേലിയൻ ഫാസ്റ്റ് ബൗളർ സ്പെൻസർ ജോൺസൺ, ന്യൂസിലാൻഡ് താരം സക്കാരി ഫോക്സ്, സ്പിന്നർ ശ്രേയസ് ഗോപാൽ, ഓസ്ട്രേലിയൻ ഓൾറൗണ്ടർ മാത്യു ഷോർട്ട് എന്നിവരെയും ടീം ഒഴിവാക്കിയേക്കുമെന്നാണ് റിപ്പോർട്ടുകൾ.