രജനീകാന്ത് നായകനായ സൂപ്പർഹിറ്റ് ചിത്രം ‘ജയിലറിലെ’ തരംഗമായി മാറിയ ഗാനമായിരുന്നു തമന്ന ഭാട്ടിയയുടെ ‘കാവാലാ…’. സോഷ്യൽ മീഡിയയിലും ഇൻസ്റ്റാഗ്രാം റീൽസുകളിലും വൻ തരംഗം സൃഷ്ടിച്ച ഈ ഗാനത്തെക്കുറിച്ചും തന്റെ പ്രകടനത്തെക്കുറിച്ചും നടി തമന്ന വെളിപ്പെടുത്തിയ കാര്യങ്ങൾ ഇപ്പോൾ സിനിമാ ലോകത്ത് ചർച്ചയാകുന്നു.
പ്രശസ്ത കൊറിയോഗ്രാഫർ ഫറ ഖാന്റെ യൂട്യൂബ് വ്ലോഗിനായി നൽകിയ അഭിമുഖത്തിലാണ്, ‘കാവാലാ…’ ഗാനത്തിലെ തന്റെ പ്രകടനത്തിൽ താൻ പൂർണ്ണ തൃപ്തയല്ലായിരുന്നുവെന്ന് തമന്ന തുറന്നുപറഞ്ഞത്. താൻ ഒരു പ്രൊഫഷണൽ നർത്തകിയല്ലെന്നും, അതിനാൽ ക്യാമറയ്ക്ക് മുന്നിലെത്തുന്നതിന് മുൻപ് കഠിനമായി പരിശീലിക്കാൻ താൻ ആഗ്രഹിക്കാറുണ്ടെന്നും താരം വ്യക്തമാക്കി.
“ആജ് കി രാത്ത് എന്ന ഗാനത്തിനായി ഞാൻ 15 ദിവസം പരിശീലനം നടത്തിയിരുന്നു. അത്രയും സമയം ചെലവഴിക്കാൻ എനിക്ക് ഇഷ്ടമാണ്. എന്നാൽ കാവാലാ ഗാനത്തിന്റെ ചിത്രീകരണ സമയത്ത് എനിക്ക് അല്പം അതൃപ്തി തോന്നിയിരുന്നു. എനിക്ക് കുറച്ചുകൂടി നന്നായി ചെയ്യാമായിരുന്നുവെന്ന് ഇപ്പോഴും തോന്നാറുണ്ട്,” തമന്ന പറഞ്ഞു.
അനിരുദ്ധ് രവിചന്ദർ സംഗീതം നൽകിയ ഈ ഗാനം അരുൺരാജ കാമരാജാണ് എഴുതിയത്. ശിൽപ റാവുവിന്റെ ആലാപനവും തമന്നയുടെ ഡാൻസും ചേർന്നപ്പോൾ ഗാനം വമ്പൻ ഹിറ്റായി മാറുകയായിരുന്നു. നെൽസൺ ദിലീപ് കുമാർ സംവിധാനം ചെയ്ത ചിത്രത്തിന്റെ രണ്ടാം ഭാഗമായ ‘ജയിലർ 2’ അണിയറയിൽ ഒരുങ്ങുകയാണ്.