രാജ്യം ഉറ്റുനോക്കുന്ന മൂന്നാം മോദി സർക്കാരിന്റെ പൂർണ്ണരൂപത്തിലുള്ള കേന്ദ്ര ബജറ്റ് ഇന്ന് രാവിലെ 11 മണിക്ക് ധനമന്ത്രി നിർമ്മല സീതാരാമൻ അവതരിപ്പിക്കും. തുടർച്ചയായി ഒൻപത് ബജറ്റുകൾ അവതരിപ്പിക്കുന്ന ആദ്യ ധനമന്ത്രിയെന്ന ചരിത്രനേട്ടവും ഇതോടെ അവർക്ക് സ്വന്തമാകും. വരാനിരിക്കുന്ന നിയമസഭാ തെരഞ്ഞെടുപ്പുകൾ കൂടി മുന്നിൽക്കണ്ട് കേരളം അടക്കമുള്ള സംസ്ഥാനങ്ങൾക്കായി വൻ പദ്ധതികൾ ബജറ്റിൽ ഇടംപിടിച്ചേക്കുമെന്നാണ് സൂചന. കേരളം ഏറെക്കാലമായി പ്രതീക്ഷിക്കുന്ന അതിവേഗ റെയിൽ പദ്ധതിക്ക് പച്ചക്കൊടി ലഭിക്കുമോ എന്നതാണ് സംസ്ഥാനം ഉറ്റുനോക്കുന്ന പ്രധാന കാര്യം. അടിസ്ഥാന സൗകര്യ വികസനത്തിന് വലിയ ഊന്നൽ നൽകുന്ന ഒരു സാമ്പത്തിക കാഴ്ചപ്പാടാകും ധനമന്ത്രി ഇത്തവണ മുന്നോട്ടുവെക്കുക.
ആദായനികുതിയുടെ കാര്യത്തിൽ ശമ്പളക്കാർക്ക് ആശ്വാസം നൽകുന്ന ചില ചെറിയ മാറ്റങ്ങൾ ബജറ്റിൽ പ്രതീക്ഷിക്കുന്നുണ്ട്. സ്റ്റാൻഡേർഡ് ഡിഡക്ഷൻ പരിധി ഒരു ലക്ഷം രൂപയായി ഉയർത്താനും, പുതിയ നികുതി ഘടനയിലേക്ക് (New Tax Regime) കൂടുതൽ ആളുകളെ ആകർഷിക്കാനായി ഭവനവായ്പ പലിശയിൽ ഇളവുകൾ അനുവദിക്കാനും സാധ്യതയുണ്ട്. നിലവിൽ 12 ലക്ഷം രൂപ വരെ വരുമാനമുള്ളവർക്ക് നികുതി ഇളവ് നൽകുന്നത് തുടരുന്നതിനാൽ സ്ലാബുകളിൽ വലിയ മാറ്റം ഉണ്ടായേക്കില്ല. എങ്കിലും, സാമ്പത്തിക വളർച്ചയും സാധാരണക്കാരന്റെ ജീവിതസൗകര്യങ്ങളും തമ്മിൽ കോർത്തിണക്കുന്ന നിർണ്ണായക പ്രഖ്യാപനങ്ങൾക്കായി രാജ്യം ഒന്നടങ്കം കാത്തിരിക്കുകയാണ്.