പൂനെ: പൂനെ കേതൻ അഗർവാൾ വധക്കേസിൽ സിനിമകളെപ്പോലും വെല്ലുന്ന ആസൂത്രണത്തിന്റെ വിവരങ്ങൾ പുറത്തുവിട്ട് പോലീസ്. ജൂൺ 28 ഞായറാഴ്ച പുലർച്ചെ 6:30-ഓടെ കനത്ത സുരക്ഷയിൽ മുഖ്യപ്രതി സിയ ഗോയലെയുമായി പോലീസ് ലോഹഗഡ് കോട്ടയിൽ തെളിവെടുപ്പ് നടത്തി. കേതനെ മലമുകളിൽ നിന്ന് എങ്ങനെയാണ് താഴേക്ക് തള്ളിയിട്ടതെന്ന് കൃത്യമായി മനസ്സിലാക്കാൻ മനുഷ്യരൂപത്തിലുള്ള ഡമ്മി ഉപയോഗിച്ചാണ് പോലീസ് ക്രൈം സീൻ പുനരാവിഷ്കരിച്ചത്.
പെട്ടെന്നുള്ള ആവേശത്തിലല്ല, മറിച്ച് ദിവസങ്ങൾ നീണ്ട പ്ലാനിംഗിലൂടെയാണ് സിയയും കാമുകൻ ചേതൻ ചൗധരിയും ഈ കൊലപാതകം നടപ്പാക്കിയതെന്ന് പോലീസ് കണ്ടെത്തി. കേതനെ വധിക്കാനായി ജൂൺ 14-നാണ് ഇവർ ആദ്യ ശ്രമം നടത്തിയത്. ഇതിന് ദിവസങ്ങൾക്ക് മുൻപ് തന്നെ സിയയും ചേതനും തങ്ങളുടെ പ്ലാൻ എങ്ങനെ നടപ്പാക്കണമെന്ന് ഇവിടെ വെച്ച് കൃത്യമായി പരിശീലിക്കുകയും ചെയ്തിരുന്നു. കേതനെ ഇല്ലാതാക്കാനായി ഇരുവരും ഗൂഗിളിലും യൂട്യൂബിലും നിരവധി വഴികൾ തിരഞ്ഞിരുന്നു. ഒടുവിൽ കോട്ടയിൽ നിന്ന് തള്ളിയിട്ടു കൊല്ലുന്നതാണ് അപകടമരണമെന്ന് വരുത്തിത്തീർക്കാൻ ഏറ്റവും എളുപ്പമെന്ന് ഇവർ കണ്ടെത്തുകയായിരുന്നു.
കോട്ടയുടെ ഏത് ഭാഗത്ത് നിന്നാണ് കേതനെ തള്ളിയിട്ടത് എന്നതുൾപ്പെടെയുള്ള സിയയുടെ മൊഴികൾ കൃത്യമാണോ എന്ന് പരിശോധിക്കാനാണ് പോലീസ് ഡമ്മി പരീക്ഷണം നടത്തിയത്. സിയയുടെ സാന്നിധ്യത്തിൽ ഡമ്മി കോട്ടയുടെ മതിലിന് മുകളിൽ നിന്ന് താഴേക്ക് തള്ളിയിട്ട് അന്വേഷണ ഉദ്യോഗസ്ഥർ കൃത്യമായ അളവുകൾ രേഖപ്പെടുത്തി. കേസിലെ രണ്ടാം പ്രതിയായ കാമുകൻ ചേതൻ ചൗധരിയെ പ്രത്യേകമായി മറ്റൊരു ദിവസം കോട്ടയിലെത്തിച്ച് തെളിവെടുക്കുമെന്ന് പോലീസ് അറിയിച്ചു. വിവാഹനിശ്ചയത്തിന് ശേഷം സിയ ചേതനുമായി താൽക്കാലികമായി അകലം പാലിച്ചിരുന്നെങ്കിലും പിന്നീട് ബന്ധം പുതുക്കുകയും കേതനെ ഒഴിവാക്കാൻ കൊലപാതകം ആസൂത്രണം ചെയ്യുകയുമായിരുന്നു. കൊലപാതകത്തിന്റെ കൃത്യമായ ആസൂത്രണം, പ്രതികളുടെ ഡിജിറ്റൽ തെളിവുകൾ എന്നിവ കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്.