സൗന്ദര്യത്തിന്റെ അടയാളമായി പലരും കൊതിക്കുന്ന ഒന്നാണ് കവിളിലെ ‘നുണക്കുഴി’. എന്നാൽ തന്റെ നുണക്കുഴി കാരണം സിനിമയിൽ പണി കിട്ടിയിരിക്കുകയാണെന്ന് തുറന്നു പറയുകയാണ് നടി സിദ്ധി ഇദ്നാനി. കരയുന്ന രംഗങ്ങളിൽ അഭിനയിക്കുമ്പോൾ നുണക്കുഴി തെളിയുന്നത് കാരണം താൻ ചിരിക്കുകയാണെന്ന് സംവിധായകർ തെറ്റിദ്ധരിക്കാറുണ്ടെന്നാണ് സിദ്ധി വെളിപ്പെടുത്തിയത്.
തന്റെ പുതിയ ചിത്രമായ ‘രെട്ട തല’ എന്ന സിനിമയുടെ പ്രൊമോഷന്റെ ഭാഗമായി നടന്ന അഭിമുഖത്തിലാണ് നടി ഈ രസകരമായ അനുഭവം പങ്കുവെച്ചത്. അഭിമുഖത്തിൽ കൂടെയുണ്ടായിരുന്ന സഹതാരം അരുൺ വിജയ് സിദ്ധിയുടെ നുണക്കുഴിയെ പുകഴ്ത്തിയപ്പോഴായിരുന്നു താരത്തിന്റെ മറുപടി.
സംവിധായകർക്ക് ഇഷ്ടമല്ലാത്ത നുണക്കുഴി
സിനിമയിലെ ഇമോഷണൽ രംഗങ്ങൾ ചിത്രീകരിക്കുമ്പോൾ നുണക്കുഴി വില്ലനാകാറുണ്ടെന്ന് നടി പറയുന്നു. “നുണക്കുഴിയുടെ പേരിൽ പലരും എന്നെ അഭിനന്ദിക്കാറുണ്ട്. എന്നാൽ അതൊരു വലിയ പ്രശ്നമാണ്. ഞാൻ കരയുമ്പോൾ നുണക്കുഴി തെളിയും. പല സംവിധായകർക്കും അത് ഇഷ്ടമല്ല. കരയുന്ന സീനിൽ ഞാൻ ചിരിക്കുകയാണെന്ന് അവർ കരുതും. ചിരിക്കരുതെന്ന് സംവിധായകർ പറയുമ്പോൾ, താൻ ചിരിക്കുകയല്ലെന്നും ഇത് തന്റെ നിയന്ത്രണത്തിലുള്ള കാര്യമല്ലെന്നും അവർക്ക് വിശദീകരിച്ചു കൊടുക്കേണ്ടി വരാറുണ്ട്,” – സിദ്ധി പറഞ്ഞു.
മുഖത്തെ പേശികളെ മാറ്റാൻ കഴിയാത്തതിനാൽ ഇപ്പോൾ കണ്ണുകൾ കൊണ്ട് വികാരങ്ങൾ പ്രകടിപ്പിക്കാനാണ് താൻ കൂടുതൽ ശ്രമിക്കുന്നതെന്നും താരം കൂട്ടിച്ചേർത്തു.
ഡിംപിൾ ക്വീനിൽ നിന്ന് ഗീതാഞ്ജലിയിലേക്ക്
തെലുങ്ക് ചിത്രം ‘ജമ്പ ലക്കിടി പമ്പ’ യിലൂടെ വെള്ളിത്തിരയിലെത്തിയ സിദ്ധിയെ ആരാധകർ ‘ഡിംപിൾ ക്വീൻ’ എന്നാണ് വിളിച്ചിരുന്നത്. ഈ ചിത്രം വലിയ വിജയമായതോടെ ടോളിവുഡിൽ താരം ശ്രദ്ധിക്കപ്പെട്ടു. പിന്നീട് ഗൗതം വാസുദേവ് മേനോൻ സംവിധാനം ചെയ്ത ‘വെന്ത് തനിന്തത് കാട്’ എന്ന ചിത്രത്തിലെ പാവൈ എന്ന കഥാപാത്രത്തിലൂടെ തമിഴകത്തും സിദ്ധി പ്രിയങ്കരിയായി.
ബോളിവുഡിൽ വൻ ചർച്ചയായ ‘ദ കേരള സ്റ്റോറി’ യിൽ ഗീതാഞ്ജലി മേനോൻ എന്ന വേഷമാണ് സിദ്ധി കൈകാര്യം ചെയ്തത്. അരുൺ വിജയ് നായകനാകുന്ന ‘രെട്ട തല’ എന്ന ബിഗ് ബജറ്റ് ആക്ഷൻ ത്രില്ലറിലൂടെ വീണ്ടും തമിഴിൽ സജീവമാകാൻ ഒരുങ്ങുകയാണ് താരം.