ഇന്ത്യൻ സ്കൂട്ടർ വിപണി ഇളക്കിമറിച്ച് ആക്ടിവ; എതിരാളികളെ അമ്പരപ്പിച്ച് ഹോണ്ട വീണ്ടും ഒന്നാമത്

ഇന്ത്യൻ ഇരുചക്ര വാഹന വിപണിയിലെ സ്കൂട്ടർ വിഭാഗം 2026 ഏപ്രിലിൽ അസാധാരണമായ വളർച്ചയാണ് രേഖപ്പെടുത്തിയത്. മുൻവർഷത്തെ അപേക്ഷിച്ച് 22.2 ശതമാനം വാർഷിക വളർച്ചയോടെ ടോപ്പ് 10 സ്കൂട്ടറുകളുടെ ആകെ വിൽപ്പന 5,94,443 യൂണിറ്റുകളിലെത്തി. പതിവുപോലെ വിപണിയിലെ രാജാവായി ഹോണ്ട ആക്ടിവ തന്നെ ആധിപത്യം തുടർന്നു. കഴിഞ്ഞ മാസം മാത്രം 2,20,774 യൂണിറ്റുകൾ വിറ്റഴിച്ച് 13.3 ശതമാനം വളർച്ചയാണ് ആക്ടിവ സ്വന്തമാക്കിയത്. കൗതുകകരമായ കാര്യം, വിപണിയിൽ വിൽക്കപ്പെടുന്ന മൊത്തം സ്കൂട്ടറുകളുടെ 37.1 ശതമാനവും ആക്ടിവയാണ്; അതായത് ഇന്ത്യയിൽ വിൽക്കുന്ന ഓരോ മൂന്ന് സ്കൂട്ടറിലും ഒന്ന് ആക്ടിവയാണ്! പട്ടികയിൽ 1,17,383 യൂണിറ്റുകളുമായി ടിവിഎസ് ജൂപ്പിറ്റർ രണ്ടാം സ്ഥാനത്തും, 70,339 യൂണിറ്റുകളുമായി സുസുക്കി ആക്‌സസ് മൂന്നാം സ്ഥാനത്തും തുടരുന്നു.

രാജ്യത്ത് ഇലക്ട്രിക് സ്കൂട്ടറുകൾക്ക് പ്രിയമേറുന്നതായാണ് പുതിയ കണക്കുകൾ സൂചിപ്പിക്കുന്നത്. 37,193 യൂണിറ്റുകൾ വിറ്റഴിച്ച് 34.7 ശതമാനം വളർച്ചയോടെ ടിവിഎസ് ഐക്യൂബ് ഈ രംഗത്ത് കരുത്തുറ്റ സാന്നിധ്യമായി. മോഡലുകളുടെ പേര് പരിഷ്കരിച്ച് വിപണിയിലെത്തിയ ബജാജ് ചേതക് 78.5 ശതമാനം വൻ വളർച്ചയോടെ 34,304 യൂണിറ്റുകൾ വിറ്റഴിച്ചു. യുവാക്കളുടെ പ്രിയപ്പെട്ട സ്പോർട്ടി സ്കൂട്ടറായ ടിവിഎസ് എൻടോർക്ക് 33,994 യൂണിറ്റുകളുടെ വിൽപ്പനയുമായി വിപണിയിൽ തങ്ങളുടെ സ്വാധീനം നിലനിർത്തിയിട്ടുണ്ട്. ഇലക്ട്രിക് സെഗ്‌മെന്റിൽ 78.7 ശതമാനം വളർച്ചയോടെ ആതർ റിസ്റ്റയും (17,960 യൂണിറ്റ്), 22 ശതമാനം വളർച്ചയോടെ യമഹ റെയ്സെഡ്ആറും (17,298 യൂണിറ്റ്) ആദ്യ പത്തിൽ ഇടംപിടിച്ചു.

ഈ ഏപ്രിലിലെ ഏറ്റവും വലിയ അത്ഭുതം ഹീറോ ഡെസ്റ്റിനിയുടെ റെക്കോർഡ് കുതിപ്പാണ്. 2025 ഏപ്രിലിൽ വെറും 4,393 യൂണിറ്റുകൾ മാത്രം വിറ്റിരുന്ന സ്ഥാനത്ത് നിന്ന് 488.7 ശതമാനം വാർഷിക വളർച്ചയോടെ 25,861 യൂണിറ്റുകളാണ് ഇത്തവണ ഡെസ്റ്റിനി വിറ്റഴിച്ചത്. പുതുതായി വിപണിയിലെത്തിയ ഡെസ്റ്റിനി 125, ഡെസ്റ്റിനി 110 മോഡലുകൾക്ക് ലഭിച്ച മികച്ച പ്രതികരണമാണ് ഹീറോയ്ക്ക് തുണയായത്. എന്നാൽ, ഭൂരിഭാഗം ബ്രാൻഡുകളും നേട്ടമുണ്ടാക്കിയപ്പോൾ സുസുക്കി ബർഗ്മാന് കനത്ത തിരിച്ചടിയുണ്ടായി. അടുത്തിടെ ഫെയ്‌സ്‌ലിഫ്റ്റ് അപ്‌ഡേറ്റ് ലഭിച്ചിട്ടും ബർഗ്മാന്റെ വിൽപ്പന 16.1 ശതമാനം ഇടിഞ്ഞ് 19,337 യൂണിറ്റുകളിലേക്ക് ചുരുങ്ങി.