ദേശീയ ഗ്രാമീണ തൊഴിലുറപ്പ് പദ്ധതിക്ക് പകരമായി കേന്ദ്ര സർക്കാർ കൊണ്ടുവന്ന പുതിയ പരിഷ്കാരങ്ങളെ രൂക്ഷമായ ഭാഷയിൽ വിമർശിച്ച് ലോക്സഭാ പ്രതിപക്ഷ നേതാവ് രാഹുൽ ഗാന്ധി. മോദി സർക്കാർ രാജ്യത്തെ പഴയ ‘മഹാരാജാക്കന്മാരുടെ’ യുഗത്തിലേക്ക് തിരികെ കൊണ്ടുപോകാനാണ് ശ്രമിക്കുന്നതെന്ന് അദ്ദേഹം ആരോപിച്ചു. തൊഴിലുറപ്പ് തൊഴിലാളികളുമായി നടത്തിയ കൂടിക്കാഴ്ചയുടെ ദൃശ്യങ്ങൾ എക്സിൽ പങ്കുവെച്ചുകൊണ്ടായിരുന്നു രാഹുലിന്റെ പ്രതികരണം. തൊഴിലാളികളുടെ വേതനം ചർച്ച ചെയ്യാനുള്ള അവകാശവും പഞ്ചായത്തുകളുടെ അധികാരവും കവർന്നെടുത്ത് അധികാരം ചില കേന്ദ്രങ്ങളിൽ മാത്രം ഒതുക്കാനാണ് പ്രധാനമന്ത്രി ശ്രമിക്കുന്നതെന്ന് അദ്ദേഹം കുറിച്ചു.
തൊഴിലുറപ്പ് പദ്ധതി തങ്ങളുടെ ജീവിതം മാറ്റിമറിച്ചു എന്ന് മുൻപ് അഭിമാനത്തോടെ പറഞ്ഞിരുന്ന തൊഴിലാളികൾ, ഇന്ന് മോദി സർക്കാർ തങ്ങളെ അടിമകളാക്കുകയാണെന്ന് പരാതി പറയുന്ന സാഹചര്യമാണെന്ന് രാഹുൽ ഗാന്ധി ചൂണ്ടിക്കാട്ടി. സാധാരണക്കാരുടെ ഉപജീവനമാർഗ്ഗമായ ഈ പദ്ധതിയെ നശിപ്പിക്കാനാണ് കേന്ദ്ര നീക്കമെന്നും അദ്ദേഹം കൂട്ടിച്ചേർത്തു. ഗ്രാമീണ മേഖലയിലെ അധികാര വികേന്ദ്രീകരണത്തെ തകർത്ത് ഭരണസംവിധാനത്തെ പഴയ രാജഭരണ രീതിയിലേക്ക് മാറ്റാനാണ് സർക്കാർ ശ്രമിക്കുന്നതെന്ന രാഹുലിന്റെ പ്രസ്താവന ദേശീയ രാഷ്ട്രീയത്തിൽ വലിയ ചർച്ചകൾക്ക് തുടക്കമിട്ടിട്ടുണ്ട്.