ഭാരതീയ ഇലക്ട്രിക് വാഹന വിപണിയിൽ വിപ്ലവകരമായ മാറ്റങ്ങൾ പ്രകടമായ മാസമായിരുന്നു ഈ ഫെബ്രുവരി. കാലങ്ങളായി വിപണി അടക്കിവാണിരുന്ന ടാറ്റ നെക്സോൺ ഇവി, എംജി വിൻഡ്സർ എന്നിവയെ ബഹുദൂരം പിന്നിലാക്കി മഹീന്ദ്രയുടെ പുത്തൻ കരുത്തൻ XEV 9S വിൽപ്പന ചാർട്ടിൽ ഒന്നാം സ്ഥാനം പിടിച്ചടക്കി. 2025 നവംബറിൽ പുറത്തിറങ്ങിയ ഈ മൂന്ന് വരി ഇലക്ട്രിക് എസ്യുവി, ഫെബ്രുവരിയിൽ മാത്രം 3,539 യൂണിറ്റുകളാണ് വിറ്റഴിച്ചത്. ജനുവരിയിൽ വെറും 612 യൂണിറ്റുകൾ മാത്രം വിറ്റയിടത്തുനിന്നാണ് മഹീന്ദ്രയുടെ ഈ വൻ കുതിച്ചുചാട്ടം. 19.95 ലക്ഷം രൂപ പ്രാരംഭ വിലയുള്ള ഈ മോഡലിന് ലഭിച്ച വൻ ബുക്കിംഗുകളും വേഗത്തിലുള്ള ഡെലിവറിയുമാണ് ഈ നേട്ടത്തിന് പിന്നിലെ പ്രധാന കാരണം.
രണ്ടാം സ്ഥാനത്തുള്ള എംജി വിൻഡ്സർ 2,599 യൂണിറ്റുകൾ വിറ്റഴിച്ച് വിപണിയിൽ തങ്ങളുടെ സാന്നിധ്യം ശക്തമായി നിലനിർത്തി. എന്നാൽ ഇവി വിപണിയിലെ മുൻനിരക്കാരായ ടാറ്റ മോട്ടോഴ്സിന് ഈ മാസം അല്പം തിരിച്ചടി നേരിട്ടു. ടാറ്റയുടെ ജനപ്രിയ മോഡലായ നെക്സോൺ ഇവിയുടെ വിൽപ്പനയിൽ 22 ശതമാനത്തോളം ഇടിവ് രേഖപ്പെടുത്തി. 2,410 യൂണിറ്റുകൾ വിറ്റഴിച്ച് നെക്സോൺ ഇവി മൂന്നാം സ്ഥാനത്തേക്ക് പിന്തള്ളപ്പെട്ടു. അതേസമയം, മഹീന്ദ്രയുടെ തന്നെ XEV 9e 1,889 യൂണിറ്റുകളുമായി നാലാം സ്ഥാനത്തെത്തി വിപണിയിൽ മഹീന്ദ്രയുടെ ആധിപത്യം ഉറപ്പിച്ചു.
വിൽപ്പന പട്ടികയിലെ മറ്റ് സ്ഥാനങ്ങളിൽ ടാറ്റയുടെ തന്നെ വിവിധ മോഡലുകളാണ് ഇടംപിടിച്ചിരിക്കുന്നത്. കഴിഞ്ഞ വർഷം പുറത്തിറങ്ങിയ ടാറ്റ ഹാരിയർ ഇവി 1,738 യൂണിറ്റുകളുമായി അഞ്ചാം സ്ഥാനത്തും, സ്റ്റൈലിഷ് മോഡലായ കർവ്വ് ഇവി ആറാം സ്ഥാനത്തുമുണ്ട്. സാധാരണക്കാർക്ക് ഇന്നും പ്രിയപ്പെട്ട ടാറ്റ ടിയാഗോ ഇവി ഏഴാം സ്ഥാനത്ത് തുടരുന്നു. മഹീന്ദ്ര BE6 എട്ടാം സ്ഥാനത്തും ടാറ്റ പഞ്ച് ഇവി ഒമ്പതാം സ്ഥാനത്തും എത്തിയപ്പോൾ, 870 യൂണിറ്റുകൾ വിറ്റഴിച്ച് മാരുതി ഇവിറ്റാര പത്താം സ്ഥാനം സ്വന്തമാക്കി. മഹീന്ദ്രയുടെ പുതിയ മുന്നേറ്റം വരും മാസങ്ങളിൽ ടാറ്റയുമായുള്ള മത്സരം കൂടുതൽ കടുപ്പിക്കുമെന്നാണ് വിപണിയിലെ വിലയിരുത്തൽ.