ഇപിഎഫ്ഒ അക്കൗണ്ടുകളിൽ നിന്ന് യുപിഐ വഴി നേരിട്ട് പണം പിൻവലിക്കാനുള്ള സൗകര്യം ഉടൻ നിലവിൽ വരുന്നതോടെ വരിക്കാർക്ക് വലിയ ആശ്വാസമാണ് ലഭിക്കാൻ പോകുന്നത്. ഇപിഎഫ്ഒ 3.0 എന്ന പുതിയ പതിപ്പിന്റെ ഭാഗമായാണ് ഈ സേവനം എത്തുന്നത്. ഇതിലൂടെ 5 ലക്ഷം രൂപ വരെയുള്ള തുക വളരെ വേഗത്തിൽ ഉപയോക്താക്കൾക്ക് പിൻവലിക്കാൻ സാധിക്കും. സാങ്കേതിക പരിശോധനകൾ പൂർത്തിയായതോടെ യുപിഐ പിൻ ഉപയോഗിച്ച് വളരെ എളുപ്പത്തിൽ പണം സ്വന്തം ബാങ്ക് അക്കൗണ്ടിലേക്ക് മാറ്റാൻ വരിക്കാർക്ക് സാധിക്കും.
ഈ സേവനം തടസ്സമില്ലാതെ ലഭിക്കുന്നതിന് വരിക്കാരുടെ അക്കൗണ്ട് വിവരങ്ങൾ കൃത്യമായിരിക്കേണ്ടത് വളരെ അത്യാവശ്യമാണ്. അവസാന നിമിഷത്തെ ബുദ്ധിമുട്ടുകൾ ഒഴിവാക്കാൻ അക്കൗണ്ട് വിവരങ്ങൾ നേരത്തെ തന്നെ അപ്ഡേറ്റ് ചെയ്യേണ്ടതുണ്ട്. ഇതിന്റെ ഭാഗമായി ആദ്യം ശ്രദ്ധിക്കേണ്ടത് യുഎഎൻ സജീവമാണോ എന്ന് പരിശോധിക്കുക എന്നതാണ്. സേവനങ്ങൾ ഉപയോഗിക്കുന്നതിന് യുഎഎൻ ആക്റ്റീവ് ആയിരിക്കണം. ഇപിഎഫ്ഒ പോർട്ടലിൽ ലോഗിൻ ചെയ്ത് മൊബൈൽ നമ്പറും പാസ്വേഡും കൃത്യമാണോ എന്ന് ഉറപ്പുവരുത്തുക.
കൂടാതെ, യുഎഎൻ നമ്പറുമായി ആധാർ ബന്ധിപ്പിച്ചിട്ടുണ്ടെന്നും പിഎഫ് രേഖകളിലും ആധാറിലും പേര്, ജനനത്തീയതി, ലിംഗം എന്നിവ ഒരേപോലെയാണെന്നും ഉറപ്പാക്കണം. നികുതി ലാഭിക്കാൻ പാൻ കാർഡ് വെരിഫൈ ചെയ്യേണ്ടതും വളരെ പ്രധാനമാണ്. ഇപിഎഫ്ഒ പോർട്ടലിൽ നൽകിയിരിക്കുന്ന ബാങ്ക് അക്കൗണ്ട് നമ്പർ, ഐഎഫ്എസ്സി കോഡ്, അക്കൗണ്ട് ഉടമയുടെ പേര് എന്നിവ കൃത്യമായിരിക്കണം. ക്ലോസ് ചെയ്ത അക്കൗണ്ടുകളോ ജോയിന്റ് അക്കൗണ്ടുകളോ നൽകുന്നത് പണം ലഭിക്കാൻ തടസ്സമാകും.
യുപിഐ ഇടപാടുകൾക്ക് ഒടിപി വെരിഫിക്കേഷൻ നിർബന്ധമായതിനാൽ, ആധാറുമായും പിഎഫ് അക്കൗണ്ടുമായും ബന്ധിപ്പിച്ചിരിക്കുന്ന മൊബൈൽ നമ്പർ എപ്പോഴും സജീവമായിരിക്കണം. ഇതുകൂടാതെ, ജോലിയിൽ നിന്ന് പിരിഞ്ഞ തീയതി കൃത്യമായി രേഖപ്പെടുത്തിയിട്ടുണ്ടോ എന്ന് പരിശോധിക്കുകയും പഴയ പിഎഫ് അക്കൗണ്ടുകൾ പുതിയ യുഎഎൻ നമ്പറുമായി മെർജ് ചെയ്യുകയും വേണം. അടിയന്തര സാഹചര്യങ്ങളിൽ പണം പിൻവലിക്കുന്നതിനായി ഇ-നോമിനേഷൻ അപ്ഡേറ്റ് ചെയ്യുന്നത് വളരെ പ്രധാനമാണ്. പൂർണ്ണമായും വെരിഫൈ ചെയ്ത അക്കൗണ്ടുകളിലൂടെ മാത്രമേ യുപിഐ വഴിയുള്ള വേഗത്തിലുള്ള പണമിടപാടുകൾ സാധ്യമാകൂ. അതിനാൽ രേഖകളിൽ എന്തെങ്കിലും തെറ്റുകൾ ഉണ്ടെങ്കിൽ എത്രയും വേഗം തിരുത്തേണ്ടതാണ്.