ഇന്ത്യൻ വാഹന വിപണിയിൽ ഏഴ് സീറ്റർ എസ്യുവി എന്നാൽ ഡീസൽ എൻജിൻ എന്ന ധാരണ മാറുകയാണ്. വരും വർഷങ്ങളിൽ കരുത്തുറ്റ ഹൈബ്രിഡ് എൻജിനുകളുമായി നിരവധി പുതിയ മോഡലുകളാണ് നിരത്തിലെത്താൻ ഒരുങ്ങുന്നത്. മികച്ച മൈലേജും പരിസ്ഥിതി സൗഹൃദമായ സാങ്കേതികവിദ്യയും വാഗ്ദാനം ചെയ്യുന്ന ആ പ്രധാന എസ്യുവികൾ ഇവയാണ്.
ജെറ്റോർ T2 പ്ലഗ്-ഇൻ ഹൈബ്രിഡ്
ജെഎസ്ഡബ്ല്യു മോട്ടോഴ്സ് ഇന്ത്യയിൽ അവതരിപ്പിക്കാൻ പോകുന്ന ആദ്യ 7 സീറ്റർ എസ്യുവി ആണിത്. ഈ വർഷം ദീപാവലി സീസണിൽ പുറത്തിറങ്ങുന്ന ഈ വാഹനം കംപ്ലീറ്റ്ലി നോക്ക്ഡ് ഡൗൺ വഴി ഇന്ത്യയിൽ അസംബിൾ ചെയ്യും. 1.5 ലിറ്റർ പെട്രോൾ എൻജിനും രണ്ട് ഇലക്ട്രിക് മോട്ടോറുകളും ചേർന്നതാണ് ഇതിന്റെ കരുത്ത്. 375 bhp പവറും 610 Nm ടോർക്കും ഉത്പാദിപ്പിക്കുന്ന ഈ എസ്യുവിക്ക് ഇലക്ട്രിക് മോഡിൽ മാത്രം 139 കിലോമീറ്റർ റേഞ്ച് ലഭിക്കും. 20-30 ലക്ഷം വരെയാണ് പ്രതീക്ഷിക്കുന്ന വില.
ടൊയോട്ട അർബൻ ക്രൂയിസർ ഹൈറൈഡർ 7-സീറ്റർ
ജനപ്രിയമായ ഹൈറൈഡറിന്റെ ഏഴ് സീറ്റർ പതിപ്പ് ഈ വർഷം അവസാനത്തോടെ വിപണിയിലെത്തും. ടെസ്റ്റ് മോഡലുകളിൽ നീളം കൂടിയ സൈഡ് പ്രൊഫൈലും ഓവർഹാംഗുകളും ഇതിനകം ശ്രദ്ധിക്കപ്പെട്ടിട്ടുണ്ട്. 116 bhp കരുത്ത് നൽകുന്ന 1.5 ലിറ്റർ പെട്രോൾ ഹൈബ്രിഡ് എൻജിൻ തന്നെയായിരിക്കും ഇതിലും ഉപയോഗിക്കുക. ഓൾ-വീൽ ഡ്രൈവ് സിസ്റ്റവും പ്രതീക്ഷിക്കുന്ന ഈ മോഡലിന് 18-22 ലക്ഷം വരെയാകും വില.
റെനോ ബോറൈൽ
പുതിയ തലമുറ റെനോ ഡസ്റ്ററിന്റെ ഏഴ് സീറ്റർ പതിപ്പാണ് ‘ബോറൈൽ’. 1.8 ലിറ്റർ പെട്രോൾ എൻജിനും രണ്ട് ഇലക്ട്രിക് മോട്ടോറുകളും 1.4-kWh ബാറ്ററിയും ചേരുന്ന ഹൈബ്രിഡ് സിസ്റ്റമാണ് ഇതിന്റെ സവിശേഷത. 160 bhp പവർ നൽകുന്ന ഈ വാഹനം മഹീന്ദ്ര XUV 7XO, ടാറ്റ സഫാരി എന്നിവയുമായിട്ടായിരിക്കും മത്സരിക്കുക. 18-25 ലക്ഷം രൂപയാണ് വില പ്രതീക്ഷിക്കുന്നത്.
നിസാൻ ടെക്റ്റൺ 7-സീറ്റർ
നിസാൻ ടെക്റ്റണിനെ അടിസ്ഥാനമാക്കി നിർമ്മിക്കുന്ന ഈ ഏഴ് സീറ്റർ മോഡൽ റെനോ ബോറൈലിന്റെ അതേ പ്ലാറ്റ്ഫോമിലും എൻജിൻ കരുത്തിലുമാണ് എത്തുന്നത്. 1.8 ലിറ്റർ ഹൈബ്രിഡ് എൻജിൻ തന്നെയാകും ഇതിലും ഉണ്ടാവുക. ഈ വർഷം അവസാനത്തോടെ വിപണിയിലെത്തുമെന്ന് കരുതുന്ന ഈ വാഹനത്തിന്റെ ഡിസൈനിൽ നിസാൻ തനതായ മാറ്റങ്ങൾ വരുത്തും. ₹18 ലക്ഷം മുതൽ 25 ലക്ഷം വരെയാകും ഇതിന്റെ വില നിലവാരം.