ജയ്പുർ: രാജസ്ഥാനിലെ ഭരത്പുരിൽ ബിജെപി മുൻ എംഎൽഎയെ രോഷാകുലരായ ജനക്കൂട്ടം വടികൊണ്ടു അടിച്ചു കൊലപ്പെടുത്തി. ഖനനവുമായി ബന്ധപ്പെട്ട തർക്കമാണ് സംഘർഷത്തിലും കൊലപാതകത്തിലും കലാശിച്ചതെന്ന് പൊലിസ് പറഞ്ഞു. ഞായറാഴ്ച വൈകുന്നേരം ഭോണ്ട ഗ്രാമത്തിലുണ്ടായ സംഭവത്തിൽ അതർ സിംഗ് ഭദാനയാണ് കൊല്ലപ്പെട്ടത്. ഭോണ്ട ഗ്രാമത്തിൽ അതർ സിംഗ് ഭദാനയുടെ ഉടമസ്ഥതയിലുള്ള ക്രഷർ യൂണിറ്റ് പ്രവർത്തിച്ചിരുന്നു. പ്രദേശത്ത് പാട്ടത്തിനെടുത്ത സ്ഥലത്ത് ഖനനവും നടത്തിയിരുന്നു. ഭാര്യയുടെ പേരിലായിരുന്നു ബിസിനസ് നടത്തിയിരുന്നത്.
എന്നാൽ ഖനനത്തിനെതിരെ ഭോണ്ട, റായ്പുർ ഗ്രാമങ്ങളിലെ ജനങ്ങൾ കഴിഞ്ഞ രണ്ട് വർഷമായി പ്രതിഷേധത്തിലായിരുന്നു. ഹരിയാന സ്വദേശിയായ അതർ സിങ് ഭദാന 2003ലാണ് ബയാന നിയമസഭാ മണ്ഡലത്തിൽ നിന്നും രാജസ്ഥാൻ നിയമസഭയിലേക്ക് തിരഞ്ഞെടുക്കപ്പെട്ടത്. 2008 വരെ ഇദ്ദേഹം നിയമസഭാംഗമായിരുന്നു. ഖനനമേഖലയിലേക്ക് വാഹനങ്ങൾ കടന്നുപോകുന്നത് കന്നുകാലികളുടെ മേച്ചിൽപ്പുറങ്ങളിലൂടെയാണെന്ന് ആരോപിച്ചായിരുന്നു ഗ്രാമവാസികളുടെ പ്രതിഷേധം. ഇതിന്‍റെ ഭാഗമായി പലതവണ ധർണ നടത്തുകയും വഴിതടയുകയും ചെയ്തിരുന്നു.
കോടതിയിൽനിന്ന് അനുമതി ലഭിച്ചതിനെത്തുടർന്ന് കഴിഞ്ഞ ദിവസം ക്രഷർ യൂണിറ്റിന്‍റെ പ്രവർത്തനം പുനഃരാരംഭിച്ചിരുന്നു. ഇതിനു പിന്നാലെ ഞായറാഴ്ച വൈകുന്നേരം ഭോണ്ട ഗ്രാമത്തിലെത്തിയ മുൻ എംഎൽഎയെ ഗ്രാമവാസികൾ സംഘം ചേർന്ന് ആക്രമിക്കുകയായിരുന്നു. ഗുരുതരമായി പരിക്കേറ്റ ഭദാനയെ ആദ്യം സമീപത്തെ പ്രാഥമികാരോഗ്യ കേന്ദ്രത്തിലും പിന്നീട് ജയ്പുരിലെ ആശുപത്രിയിലും പ്രവേശിപ്പിച്ചെങ്കിലും മരണം സംഭവിച്ചിരുന്നു.