ആർട്ടിഫിഷ്യൽ ഇന്റലിജൻസ് രംഗത്തെ ആഗോള പുരോഗതി വിലയിരുത്തുന്ന സ്റ്റാൻഫഡ് സർവകലാശാലയുടെ 2025-ലെ ഗ്ലോബൽ എഐ വൈബ്രൻസി റിപ്പോർട്ടിൽ ഇന്ത്യയ്ക്ക് അഭിമാനകരമായ നേട്ടം. ലോകരാജ്യങ്ങളെ അമ്പരപ്പിച്ചുകൊണ്ട് ഇന്ത്യ ഇത്തവണ മൂന്നാം സ്ഥാനത്തേക്ക് കുതിച്ചുയർന്നു. ഗവേഷണം, വികസനം, വൈദഗ്ധ്യം, അടിസ്ഥാന സൗകര്യം എന്നിവയുൾപ്പെടെ ഏഴ് സുപ്രധാന ഘടകങ്ങൾ അടിസ്ഥാനമാക്കിയാണ് 2024-ൽ രാജ്യങ്ങൾ കൈവരിച്ച പുരോഗതി റിപ്പോർട്ട് വിലയിരുത്തുന്നത്.
ഏഴിൽ നിന്ന് മൂന്നിലേക്കുള്ള ഇന്ത്യയുടെ കുതിപ്പ് ശ്രദ്ധേയമാണ് :
2023-ൽ ഇന്ത്യ ഈ റാങ്കിംഗിൽ ഏഴാം സ്ഥാനത്തായിരുന്നു. 2025-ലെ റിപ്പോർട്ടിൽ: നാല് സ്ഥാനങ്ങൾ മെച്ചപ്പെടുത്തി മൂന്നാം സ്ഥാനത്തേക്ക് എത്തി. യുഎസും ചൈനയും മാത്രമാണ് റാങ്കിംഗിൽ ഇന്ത്യയ്ക്ക് മുന്നിലുള്ളത്. ബ്രിട്ടൻ, ദക്ഷിണ കൊറിയ, സിംഗപ്പൂർ, ജപ്പാൻ തുടങ്ങിയ സാങ്കേതികമായി മുന്നിട്ടുനിൽക്കുന്ന രാജ്യങ്ങളെ പിന്തള്ളിയാണ് ഇന്ത്യയുടെ ഈ ചരിത്രനേട്ടം. ഈ മുന്നേറ്റം സൂചിപ്പിക്കുന്നത്, എഐ ഗവേഷണങ്ങൾക്കും അടിസ്ഥാന സൗകര്യ വികസനത്തിനും പുതിയ എഐ വിദഗ്ധരെ വളർത്തിയെടുക്കുന്നതിനും വേണ്ടി രാജ്യം നടത്തുന്ന ശ്രമങ്ങൾ ആഗോളതലത്തിൽ ശ്രദ്ധ നേടുന്നു എന്നാണ്. എഐ സാങ്കേതികവിദ്യയുടെ വാണിജ്യപരമായ പ്രയോഗങ്ങളിലും നയരൂപീകരണത്തിലും ഇന്ത്യ മികച്ച പ്രകടനം കാഴ്ചവെച്ചു.