ഇന്ത്യൻ സിനിമയിലെ സകലകലാവല്ലഭനും ‘ഉലകനായകനു’മായ കമൽഹാസന് ഇന്ന് (നവംബർ 7) എഴുപത്തിരണ്ടാം പിറന്നാൾ. ആറാം വയസ്സിൽ ബാലതാരമായി ചുവടുവെച്ച്, ആറു പതിറ്റാണ്ടിലേറെയായി ഇന്ത്യൻ സിനിമയുടെ വിവിധ മേഖലകളിൽ സമാനതകളില്ലാത്ത സാന്നിധ്യമായി നിറഞ്ഞുനിൽക്കുകയാണ് ഈ അതുല്യ പ്രതിഭ.
അഭിനേതാവ് എന്നതിലുപരി തിരക്കഥാകൃത്ത്, സംവിധായകൻ, ഗാനരചയിതാവ്, ഗായകൻ, നിർമാതാവ് തുടങ്ങി സിനിമയുടെ സമസ്ത മേഖലകളിലും സ്വന്തം കയ്യൊപ്പ് പതിപ്പിക്കാൻ അദ്ദേഹത്തിന് സാധിച്ചു. 1960-ൽ ‘കളത്തൂർ കണ്ണമ്മ’ എന്ന ചിത്രത്തിലൂടെ ബാലതാരമായി തുടക്കം കുറിച്ച കമൽഹാസൻ, ആദ്യ സിനിമയിലൂടെത്തന്നെ മികച്ച ബാലതാരത്തിനുള്ള രാഷ്ട്രപതിയുടെ സ്വർണ്ണമെഡൽ സ്വന്തമാക്കിയാണ് വരവറിയിച്ചത്. അസാധാരണമായ നടനവൈഭവം, ശാസ്ത്രീയ നൃത്തത്തിലെ മികവ്, ആക്ഷൻ രംഗങ്ങളിലെ കൃത്യത എന്നിവ കമൽഹാസനെ എന്നും മറ്റു താരങ്ങളിൽ നിന്ന് വേറിട്ടുനിർത്തി.
‘നായകൻ’, ‘മൂന്നാം പിറൈ’, ‘അൻപേ ശിവം’, ‘ഇന്ത്യൻ’, ‘അവ്വൈ ഷൺമുഖി’, ‘ദശാവതാരം’, ‘വിക്രം’, ‘മൈക്കിൾ മദന കാമരാജൻ’ തുടങ്ങി വൈവിധ്യമാർന്ന എത്രയോ കഥാപാത്രങ്ങളിലൂടെയാണ് അദ്ദേഹം സിനിമാപ്രേമികളെ വിസ്മയിപ്പിച്ചത്. സിനിമയോടുള്ള അടങ്ങാത്ത പ്രണയവുമായി ഉലകനായകൻ ഇനിയും നിരവധി പതിറ്റാണ്ടുകൾ വെള്ളിത്തിരയിൽ തിളങ്ങിനിൽക്കണമെന്നാണ് ലോകമെമ്പാടുമുള്ള ആരാധകരുടെ പ്രാർത്ഥന.