ഡൽഹി: കോക്രോച്ച് ജനതാ പാർട്ടി നേതാക്കൾ വിദേശ ഏജൻസികളിൽ നിന്നും ശത്രുരാജ്യങ്ങളിൽ നിന്നും അനധികൃതമായി പണം കൈപ്പറ്റി രാജ്യവിരുദ്ധ പ്രവർത്തനം നടത്തുകയാണെന്ന ആരോപണവുമായി കേന്ദ്ര സർക്കാർ. ഇന്ത്യയിൽ അശാന്തിയും അരാജകത്വവും സൃഷ്ടിക്കുകയാണ് ഇവരുടെ ലക്ഷ്യമെന്ന് കേന്ദ്രമന്ത്രി ജിതേന്ദ്ര സിങ് വെളിപ്പെടുത്തി.
സി.ജെ.പി സ്ഥാപകൻ അഭിജീത് ദിപ്കെ അമേരിക്കൻ ദാതാക്കളിൽ നിന്നും, പാർട്ടി സ്ട്രാറ്റജിസ്റ്റ് അശുതോഷ് റാങ്ക പാകിസ്ഥാൻ രാഷ്ട്രീയക്കാരിൽ നിന്നും പണം സ്വീകരിച്ചതിന്റെ കൃത്യമായ തെളിവുകൾ കൈവശമുണ്ടെന്ന് ജിതേന്ദ്ര സിങ് വ്യക്തമാക്കി. രാജ്യത്തിനകത്തും പുറത്തുമുള്ള ഇന്ത്യ വിരുദ്ധ ശക്തികളാണ് ഇത്തരം പ്രസ്ഥാനങ്ങൾക്ക് പിന്നിൽ പ്രവർത്തിക്കുന്നതെന്നും അദ്ദേഹം ആരോപിച്ചു.
അടുത്തിടെ ഡൽഹിയിൽ നടന്ന പ്രതിഷേധങ്ങൾ അരാജകത്വം ലക്ഷ്യമിട്ടായിരുന്നുവെന്ന് ബി.ജെ.പി വക്താവ് തുഹിൻ എ. സിൻഹ കുറ്റപ്പെടുത്തി. ഔദ്യോഗിക വിലക്കുകൾ ലംഘിച്ച് ജന്തർ മന്തറിൽ കടന്നുകയറിയതിനും സമാധാന അന്തരീക്ഷം തകർത്തതിനും സി.ജെ.പി വക്താക്കളായ സൗരവ് ദാസിനും അശുതോഷ് റാങ്കയ്ക്കും ഡൽഹി പോലീസ് സമൻസ് അയച്ചിട്ടുണ്ട്. ഒക്ടോബർ 10-ന് സമാധാന ബോണ്ടിൽ ഒപ്പിട്ടു പുറത്തിറങ്ങിയ ഇരുവരും, ഒക്ടോബർ 13-ന് മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് സുരക്ഷാ ബാരിക്കേഡുകൾ മറികടക്കുകയായിരുന്നുവെന്ന് ബി.ജെ.പി വക്താവ് കൂട്ടിച്ചേർത്തു.
അതേസമയം, വിദേശ ഫണ്ടിങ് ആരോപണങ്ങൾ തള്ളി പ്രതിപക്ഷം രംഗത്തെത്തി. ബി.ജെ.പി നേതാക്കളുടെ ആരോപണങ്ങൾക്ക് യാതൊരു തെളിവുമില്ലെന്ന് കർണാടക ആഭ്യന്തരമന്ത്രി പ്രിയങ്ക് ഖാർഗെ പറഞ്ഞു. തെളിവുകളില്ലാതെ ഇത്തരം ആരോപണങ്ങൾ ഉന്നയിക്കുന്നത് കേന്ദ്ര ആഭ്യന്തര മന്ത്രാലയത്തിന്റെയും രഹസ്യാന്വേഷണ ഏജൻസികളുടെയും പരാജയമാണ് കാട്ടുന്നതെന്നും അദ്ദേഹം വിമർശിച്ചു.